Read Ranglong 1 KORINTH 2 Bible Online

1 KORINTH 2 - Ranglong bible

1 KORINTH 2

¹Unai andit ngai, nangni kom Pathian chongtak anthup aril ranga ka hong lai han chongkam ansang le chongril anthuk hong mang makunga.

²Hun alakte na bil u na kei hong oma, Isua Krista le abingtena Krosa ei thina rui rong nok anten atei ite ruia ariat ranga ka malunga masui makung.

³Na bil u na ka omlai han, ka chuaia, anchi chunga le rathatak ansak sabaka kei om ani;

⁴Hava laia ka chong le ka thang hong rila han miring hianna tiang ngala singsuakna anchel maka, hanek ten Rathana le Pathian sinthotheina ranak hakeng anlanga ka riata.

⁵Nei iam u na ha miring hianna lama ei anboi noka tenchu Pathian sinthotheina tianga ei anboi theina ranga.

⁶Hanum nisela, ratha tianga ratitung ngai ranga hianna thang keia hai tit ani; tenchu hava hianna ha hiva ramual ata suak nimak, hiva ramual ruia ningneina adon ngai atam nimak, amani ningneina chu hekna tianga apan tir keng ani zei.

⁷Atuna hianna rui kei ril hi chu Pathian chongril anthup hianna ani, hava ha miring anina tak ata anthup ani; tenchu ama han ramual ansiang man ata koini ngai nei anlal theina ranga alei athang sua ani.

⁸Hiva ramual aruai ngai kara tuten hiva hianna ruia ariat om u mak. Ariat mi ni u sela chu anlianpu Puma ha Krosa ei makhai u nok ranga anina.

⁹Tenchu Pathian lekhabuna anziak anga, “Mita lan mu ngai lui, kuara lan riat ngai lui, Lungrila andonna lama sui ngai lui, Hava tak ha ama andit ngai dora ranga ei lei mansuk pe ani.”

¹⁰Asik chu Pathianin ama a Ratha lehan koini ngai koma achong anthup ha ei manlang; Ratha han aloma ei thun kiar keng, Pathian derdin anthuk le anthup tenpei um ei thun ani.

¹¹Asik chu miring na rui ngai ariat chu miring ratha den keng, havan tin anga han, Pathian aruia ariat chu Pathian Ratha den keng.

¹²Ten koinin chu hi ramuala ratha aleia man nimak me, haneka Pathian alungkhamna le koini ranga aloma ei na pek ngai dora nei lei riat theina ranga Pathian ata ahong Ratha ha keng nei lei chang.

¹³Hasika han, hava ngai ruia han, miringin ei anchuna ei riat thei anga hianna manga chong aril nimak me, tenchu Rathan ei manchuna ang taka keng chong nei ril, Ratha ruia ariat ngai kom den keng Ratha atak ruia nei ril thei.

¹⁴Ratha Anthiang ei om nokna miring dora chu Pathian ata ahong Ratha ahong anpek ha lei pom thei mak. Hava ang miring ngai chu ei riat nok sika ama rang khopa chu amo anlona duai keng. Asik chu, anina u ngai ha ratha lehan rui ei anril ani.

¹⁵Tenchu ratha mi ngai chu alompeia anina ha ratha lehan rui azek theia, ama aruia chu tuten azek thei om no ni.

¹⁶Asik chu Pathian lekhabun ei ril anga, “Tumo Puma mandon ariat theia ama anchu ngoi thei rang na ni?” Tenchu, Krista malung vong chu koinin na don.