Read Ranglong 1 KORINTH 3 Bible Online

1 KORINTH 3 - Ranglong bible

1 KORINTH 3

¹Ka parual andit ngai, ratha mi ngai anga na la pham thei u makung; iamna lama Kristian naipang anga keina pham u a la ni.

²Bu keina do u noka ranu ti keng kei na la manbuang bak u a la ni; asik chu hava ranga han aruala ni u mak chena, atun um hava ranga han aruala ni u mak che.

³Asik chu atun tena hin hi ramuala mi ngai leng dan anga nei la om u. Na kar u na khamaret le ankhalna ala lengin hava taka han ramual mi nei ni u na le ramual mi ngai khovang ei sak u le zui nei anphua u ha anlang mak mo?

⁴Mi khat, “Koi chu Paul ami keng ka ni,” hanuk mi atei khatin, “Koi chu Apolo mi ka ni,” na ti u kar pei chu a om lek u dan ha ramual mi ang mai phua u mak che mo?

⁵Apolo mo ole Paul imo ani? Asa kiar, koini ngai chu Pathian dorbondom mai na nia, amani ata iamna nei hong chang u na ani. Pathian ang kha khat tak chunga asin ei na pek anga han.

⁶Koiin ka linga, Apolo han akunga ti ava leia tenchu akung alei anlian chu Pathian ani.

⁷Hasik han alingpa ham ite ni mak hatuka akunga ti aleipa ham ite ni mak tenchu akung alei anlianpu Pathian ha keng abul khit.

⁸Alingpu le akunga ti ava leipu ha ite ei antei u na om mak; hasik han aning chipa asin tho u anga ei lo u na chu Pathianin pek inti.

⁹Asik chu, koini ngai hi Pathian ranga a sin thopui alom ngai na ni; hatuka nangni ngai hi Pathian ei buak aphil na ni u hanuk chu Pathian a in um na ni u.

¹⁰Pathianin alungkham ei na pekna anga asin athei khit anga chopui kei phun. Hanuk chu hava han mi teiin ahong phuna. Tenchu nangnin hontinmo nei phun u ha anreng u ro.

¹¹Tuten atei chopui phun lai no rase asik chu Pathianin Isua Krista rong hi chopui khat dak ani ranga ei phun ani.

¹²Senkhatin chu in ei man luanna ranga rangkachak, rupa, lunglu le abuaka oma, atei senkhatin chu thing, ngaidi, sapon anding om inti.

¹³Krista nikhua tika chu mi tin asin tho ei sana anlang inti; asik chu hava nikhua han mitin asin tho ha moiin la manlang inti. Asin tho ei sana ha moiin mansina la manlang inti.

¹⁴Ei phun andet tit ngai chu moiin aliaiam siat no ni; hatuka aphunpu han ei lo chu man inti.

¹⁵Tenchu asin tho moia akang pe ngai chu la dok inti; hanuk chu moia akangam adiar tit ngai chu ama aninga zokna la chang inti.

¹⁶Nangni ngai hi Pathian biakin na ni u ti le Pathian Ratha ei ansanna atina na riat nget u na.

¹⁷Pathian biakin ansiat ngai chu Pathianin hava mi ngai um la masiat inti. Asik chu, Pathian biakin hi chu anthiang ani, hava biakin tak ha nangni ngai len ha na ni u.

¹⁸Naninga amo anlo u no ro. Ramual dingmun le anrual tenpeia ahiana anbetoka na om u ten, ahian tatak nei ni thei u na ranga amo anlo u ro.

¹⁹Asik chu ramualin ahiana ei manlo ngai dora chu Pathian mit muna chu amo ani. Pathian lekhabuna ei ti: “Pathianin mi hian ngai chu ei ancharna chunga amanoka.”

²⁰Hatuka Pathian lekhabu reta ati na, “Pathianin mi hian ngai ei mandon u na akorong,” ei nina ariat pe na.

²¹Miring nina le ei tho theina ngai dora tak chunga tuten anlianpui no rase. Asik chu alom renga nangni ata asuak kiar keng.

²²Paul ti ro, Apolo, Pitor hanuk hi ramual, damna le thina, atun taka hun le nangkana hun tikiar ro aloma nangni na kiara keng ei om.

²³Hatuka nangni ngai hi Krista ata na ni u hanuk Krista hi Pathian ata ani.