Read Ranglong 1 KORINTH 4 Bible Online

1 KORINTH 4 - Ranglong bible

1 KORINTH 4

¹Koini ngai hi Krista asuak atina le adongalua anga Pathian chong atak anthup arung ranga bar anbangsua atina mi tinin na belbo rase.

²Hava ang suak ani rang anten amani ngai ha a pu ranga aiamrua khata ansin rase.

³Atun hin nangni ngai na nina tak le mo ole miring na dingmun le ankhi ranga ka mandon anga chu rui asin sabaka ka teta; koi ka ning ngala hantin han ankhina makung.

⁴Asik chu ka nina le kei andonna chu masial abui anga kan betok ngalam nisela atak taka masial abui kei antina ni maka. Tenchu ka chunga rui aril thei chu Puma ha ani.

⁵Hasik han hun adik tak ahonga suak maseng chu tute tak chunga rui lei ril u no ro. Puma ahong maseng ruiril hekna ngak inti. Aman azing kara rui anthup ngai dora chu ra-anga la hong choi inti; hatuka miring lungrila mandon asia ngai ha la manlang inti. Hava tika han mi tinin aning chipa Pathian kom ata anpakna la chang unti.

⁶Parual andit ngai, koi ka ning lena le Apolo koini anni a en ruana amanga, na rang u na hiva chong ngai hi keina ril ani u zei; asik chu koini manga nangnin anziak anga, “Dan adik chu Poisak ro” ti anchuna nei man u na ranga. Na kar u na tuten angkhat ngalin siat anril le sat anchuna borai tho no rase.

⁷Tumo, nang mi atei ranga anan sang? Aloma nei don ngai dora ha Pathianin na pek luia mo a om? Hanle, nei man ngai dora ha dan anga ei na pek ni mak mo? Hanle, hontinmo borai nei la tho thei?

⁸Atun hin nei nang u ngai dora nei don sua mo ani u zei? Atun hin anei sua mo na ni u zei? Na la ni ngal nokam reng akai sua mo na ni u zei? Reng tatak nei kai u rang chu kei zot ngal; hankeng koinim na bil u na lokona reng nei kai theina ranga.

⁹Koi ka ninga kei anmu dana chu koini kuitir anti ngai hi min ei na dema mipui matona athi rang anga Pathianin nuk khita ei na manlang. Asik chu koini hi ramuala le vanpalai ngai le miring matona elsel nei ruai ani zei.

¹⁰Krista ranga koini hi amona nei anlo; tenchu Kristana han nangni chu ahian na ni u. Koini na chuai lai taka nangni chu nei lei rat u. Koini andema na om lai taka nangni chu anlala nei lei om u.

¹¹Atun lai tak hin koini chu von ancham le tin rala le puan abuia nei om; raimol asaka nei om; hatuka muntina chamsol nei anvoi.

¹²Hatuka sin atho chunga nei om; antir aruai chu chunga borsang nei pek; ansinsak chungam adiar om nei tho.

¹³Mualphui nan sak lai um chong annuai le nei masang. Koini ngai hi avian tenpeia hin hi ramual ranok nei ni; atun tak hin hi ramual ranga alua le apol nei chang.

¹⁴Nangni ngai maimok ansakna ranga ni maka tenchu ka long kei adit ngai nei ni u tuara na sing suak u rase atina hiva ngai hi kei hong maziak.

¹⁵Asik chu Kristana anan ruai u rang asang som ngal om sela pa chu angkhat bang keng. Asik chu Krista Isuana pa anga na kom u na thang ahui kei hong mantung.

¹⁶Hasik han na kom u na ka anga ani ranga keina mathem u ani.

¹⁷Hava sika han Timothi chu na kom u na kei hong tir. Ama hi Kristana kei madit le aiamrua ka naipasal. Ama han Krista Isua riti ruaia lampui kei ro ngai na hong man riat sir unti; hava tak ha muntina kuibing tina kei hong manchu ani.

¹⁸Na kom u na kei hong lai nok rang ei ni sika senkhatin chu borai aleia thom a oma;

¹⁹azot ten, anrapa na kom u na hong ka tinga tenchu borai atho ngai chonga ni maka ka koma sinthotheina ranak ariat ranga.

²⁰Asik chu Pathian aram chu chong rui ni mak, tenchu ranak neina le keng.

²¹Hovamo nei zot u ngal? Na kom u na raimol le kei hong rang mo nei zot u? Ole lungkhamna le omannuina ratha le mo?