Read Ranglong 1 KORINTH 5 Bible Online

1 KORINTH 5 - Ranglong bible

1 KORINTH 5

¹Adik taka chu na kar u na uiare na tam sabak u atina thang asuaka. Hava ang uiarena chu nam atei ngai ngala la om ngai mak. Mi khat anun changnu le azal tenpei thang ka lei riata.

²Hatuka hava sunga han nangnin borai nei la tho u? Haneka na malung ei na u ranga chong anina. Hava ang sin athopu chu na kar u ata nei masuak u rang ha asa khit.

³Ka pum a om ngal nokam rathana chu na bil u na a om ka ni. Hava anga om salui atho tak chunga na bil u na a om anga koini na Puma Isua Krista raminga rui kei ril sua keng ani zei.

⁴Koini na bila a om na Puma Isua ei ratna lehan nangni ngai le ka ratha anlop le;

⁵hava ang mi chu ataksa ei siat theina ranga Soitan akut chunga anbetok rase asik chu Puma nikhua lian tika a ratha ei zok theina ranga han.

⁶Borai nei tho u rang hi anhui u mak che. Anril nei riat u anga, “Chol alakte nei thaka kola sunga bu dora chol ei sip zit ani.”

⁷Chol marua anga nei siat u ngai ha khai u ro; asik chu alom pumpuia atak nei ni thei u na ranga. Hatika chu chol anchel lui kolana om bu anga nei thar thei u na ranga. Atak taka chu nangni ngai hi chol anchel lui ang na ni u. Koini Zokna Panta nikhua lian ei hong nai sika Krista Zokna Pantana Berate chu anthat sua zei.

⁸Hasik han hong u ro, chol marua anga nei siatna le ni lui tana, khamaret le asiatna chol anchel lui tana tenchu adik le atak chol anchel lui bu le Zokna Panta chu pham u rei.

⁹Uiare ngai le anlop nok ranga ka lekha hong mathuana kei hong maziak.

¹⁰Hiva huna mi uiare ngai, mita ningolna adon, mi donglua alua ranga azot le miramil abiak ngai le anlop thak u no ro kei ti ni mak, hantin ani nok ten hi ramual amaka ase nei nang na lai om un na ti.

¹¹Tenchu atun keina hong ril zot u chu, aiam bila mi ka ni anti chungin uiare, mi ta ning a ol, miramil anmok, ahe ak ana, anri anhai, anru mi aniten anlop pui u no ro, bu ngal abila nek u no ro.

¹²Apanga mi rui kei rila imo koi kei nang? Pathianin amani chunga rui ril inti.

¹³Tenchu nangnin asunga na mi u ngai chunga rui ril u mak che mo? Pathian lekhabuna anga, “Na kar u ata mi salui chu rasua u ro,” ei ti.