Read Ranglong 1 KORINTH 6 Bible Online

1 KORINTH 6 - Ranglong bible

1 KORINTH 6

¹Kristian na kar u na ansualna na suak u le hava rui azek ranga tun mo Pathian mi anthiang ngai koma se lui ta na aiam nok ngai koma ase ngam mo na om u?

²Pathian mi anthiang ngaiin hi ramual rui ei la ril rang atina riat u mak che mo? Ramual rui ei ril thei na ni u tak anten rui asin tengai azek thei ranga arua anga ansabei thei u non mo?

³Vanpalai ngai chunga rui nei la ril rang atina riat u mak che mo? Hiva atuna nei damna ruia hi chu asinte ni mak mo!

⁴Hasik han nangni ngai amanga hi ramual ruia anzeka a om thei ten kuibinga nina chang lui ngai mo ruirilna na na mansut u?

⁵Na rang u na chu anzakna chong anina. Kristian na kar u na unai le unai ansualin hava rui azek thei rang ang mi hian khat ngal om lui rang chu iti na mo?

⁶Tenchu Kristian khatin alom khat tak chunga rui aril ranga aiam nok ngai koma anbetok u na.

⁷Nangni le nangni nei ansual u nana devan nei adom u na han rati nei tung u nokna duai keng anlang; hanek ten asia nei anlo u rang ha sa ual mak mo? Hanuk chu nei machan ha sa ual no ni mo?

⁸Hanek ten nangni ngai lenin keng therkhak na song u na hanuk nan sinsakansiat u na; hatuka na parual u ngai tak chung lena nei tho u.

⁹Pathian mit muna bai ankham ngaiin Pathian aram ei lua u nok rang riat u mak che mo? Amo anlo u no ro. Uiare, miramil anmok, mi le achai, pinkua hur ngai mo

¹⁰Ole mi ta anruk azot, uama adon, anri anhai, mi donglua luak rang azot le anru angkhat ngalin Pathian lengna ram lua u thei u no ni.

¹¹Nangni ngai senkhat chu hava ang mi nei ni u. Tenchu koini na Puma Isua Krista raming le hanuk koini na Pathian Ratha lehan naning chipa salui ata ansuk sua le Pathian koma dali ang andar sua le Pathian matona bai ankham lai lui nei ni u ani zei.

¹²Nangni senkhatin nei ti u chu, “Ka ranga bai ei ankhamna ngal om mak.” Adik; tenchu na rang u na aloma asa kiar tina ham ni mak, ka ranga bai ankham ngal nokam, tenchu alompeiin suak anchok anga na betok thei no ni.

¹³Mi senkhatin, “Bu hi na von ranga, hanuk na von hi bu rang keng,” ti un na ti. Tenchu Pathianin aninin la manrel inti. Na taksa hi ui nei re pui na ranga ni mak tenchu Puma hasondomna ranga ani; hava rang han Puman na taksa ei zon.

¹⁴Pathianin, Puma chu athi ata ei mathui ret hava anga han amanin um koini ngai aranak neina le na la mathui inti.

¹⁵Na taksa u ha Krista taksa neinun khat atia na riat u hale. Havantin han anin le hanle Krista a taksa neinun khat ha achoia noti taksa na mo kei va sin rang? Hava ha chu lei mak rak ta ro!

¹⁶Nei riat u nok ranga ei ni theina aleia om; ataksa notizuar le avan zom tak chu apumpuia ama lehan taksa munkhat keng ei van chang pui. Pathian lekhabuna avar sara ei ti, “Anni ngai ha pumkhat la ni unti.”

¹⁷Tenchu Pumana aninga ataksa ava zom ngai chu rathana ama lehan pumkhat ani u.

¹⁸Nangni ngai uiare ata rot u ro, miringin pap ei tho dora hi ataksa varal ani; tenchu min uiare nan ten ama aninga ataksa pap ei tho ani.

¹⁹Na taksa u hi Ratha Anthiang ei omna biakin ani; nangni na sunga a ompu ama ha Pathian ata aman nei chang u atina riat u mak che mo? Naninga na ta anchang thei ulai no ta ni, tenchu Pathian ta ke na ni u.

²⁰Asik chu ama han man le ei na rachok sua keng na ni u zei. Hasik han na pumpui u hi Pathian lianna ranga mang u ro.