Read Ranglong 1 KORINTH 7 Bible Online

1 KORINTH 7 - Ranglong bible

1 KORINTH 7

¹Hanuk ret chu nangnin chongbai nei hong maziak u ngai ruia. Pasalin nungak ei lak nok rang hi asa.

²Tenchu uiare ata ei anheng thei u na ranga pasalin nungak la chip u rase; hatuka nupangin um ruathar la chip u rase.

³A ruatharin a nungak matai thei rase hatuka a nungakin um a ruathar ha matai rase; hantin han aninin u ha anmatai ansiat u rase.

⁴Nupangin ningneina don maka ten adon chu a ruathar, havan tin ang han Pasalin um ningneina don mak ten adon pe chu a nungak ha ani.

⁵Nangni ngai angkhat angkhat ha anchan u no ro. Pathian kom bor nei zong u na rang hun nei mang thei u na ranga chong anrual chunga nikhua naite ranga nan kar tot thei u. Hava suale, Soitanin nangni ngai nei diar thei u nokna chunga ei na mansin u nokna ranga nupui param nei ni u na surtit u ro.

⁶Tenchu nei tho nget u rang anga ni maka ten phalna anga hiva chong keina ril u ani.

⁷Adik taka chu mi dora hi koi anga, ani ranga hin kei zot ani. Tenchu angkhakhat hi Pathian kom ata abing chipa lungkhamna dan amana; angkhatin hiva ang dan, atei ngaiin atei ang dan, amana.

⁸Haneka ruathar lala lui ngai le arong ngai koma hiva hi ka chongbe ani zei, amani hi koi ka anga a om athei uten amani rangam asa.

⁹Tenchu amani han anrung thei u nok rang anten nungak lak rase; asik chu ningolna moia anga akang nek tenchu in ei nei ha asa.

¹⁰Hanuk ret chu, in anei sua ngai ranga, hiva chong hi keina pek ani u zei, tenchu koiin keina pek ni u mak, Puman ei na pek u keng a nungak hi a ruathar kom ata rota se no rase.

¹¹Hantin han a ruathar kom ata a nungak a rota ase ten ruathar laluia va om rase, hanoten a ruathar lehan an om ret u rase hatuka a ruatharin um, a nungak chu mak lai no rase.

¹²Hanuk mi dora ranga koiin kei ti ani zei, Puma ni mak ati; Kristian khat peiin a iam nok nupang ei va lak aniten hatuka hava nupang ham ama bila a om ranga anphal tenchu pasalin mak lai no rase.

¹³Havantin ang han, nupang khat peiin a iam nok pasal alak ten hatuka hava pasal ha ama bila a om ranga anphal tenchu nupangin um a pasal mak no rase.

¹⁴Asik chu Pathian iam lui pasal ha hava a nungak zara Pathian mit muna apom ruana eia tet keng ani zei. Hava anga Pathian a iam nok nupang ham a ruathar zara Pathianin ei pom chi na antet keng ani zei. Havan tin ani nok anten anai u ngai ha Pathian iamlui nai ei ni u rang anina ten Pathianin amani ngai ha ei pom ani u.

¹⁵Hanum nisela Pathian iamlui mi khatin amak rang a zot anten chu mak rase. Hava ang ruia chu Kristian unai kara a ruathar mo ani ole a nungak mo ani ei zok theina ani zei. Asik chu Pathianin phukdaia aleng ranga ei na pai keng na ni.

¹⁶Asik chu nang Kristian nupangin na ruathar ei zok le ei zok nok rang hontinmo nei riat? Nang Kristian pasalin na nungak nei mazok thei rang le thei nok rang hontinmo nei riat?

¹⁷Puman na chan ei na pek ang chipa le Pathianin ei na paina ang chipa leng u ro. Hiva ang dan kuibing tinam kei hong thopui u ani.

¹⁸Vun an at suale Pathianin ei paina atia apom a om ten avun ei an atna ha anthup pui no rase. Avun an at mana Pathianin ei paina apomten vun an at luia om len ta rase.

¹⁹Asik chu vun an at le vun an at lui hi ite ni mak; anang khit chu Pathian chong atel ha keng aru.

²⁰Pathianin ei na kuina apom tak chu aiam anga om len ta rase.

²¹Nang suak na ni lai tak mo Pathianin ei na kui ha? Andonna no ro. Tenchu azok theina lampui na man ten hava ha azina tho ro.

²²Asik chu Puman ei kui suak chu Pumana azok mi keng ani zei. Havan tin ang han Krista han azok sua ei kui tak chu ama asuak chang len rase.

²³Nangni ngai man le anchok sua keng na ni u zei, hasik han mi ngai asuak ni ulai mak che.

²⁴Ka unai andit ngai, nei ankui u na na dingmun u chip lehan Pathian anlop pui u na ro.

²⁵In la nei lui nungak ngai ruia nei hong maziak u ruia hi chu Pathian kom ata ite chong riat makung, tenchu aiam rua mi khat keini theina ranga Puma a lungkhamna achang sua mi anga kei zotna kei hong manlang ani.

²⁶Atun taka ei anbuaina andon chunga nei omna na dingmun chipa a om hi miring ranga asa khit.

²⁷Nungak alak mo na ni zei? Na ni ten ama amak ret ranga val lai no ro. Nang hi nungak la lak mak che mo? A lak nok na ni ten havan tiang han anhoi lai nok asa.

²⁸Tenchu, in na nei vingam ni rase pap nei va tho tina chu ni mak. Hanuk chu nungakin in anei lem nisela ama ham masial no ni. Hantin han ani ngalam in anei sua ngai ranga a nikhuana antakna suak pe unti. Hantin aniten lungkham ke ka na manruai u.

²⁹Ka unai ngai, hiva chong hi keina ril u na a omzia chu hintin hin; hun hi atam zet ni lai mak; atun ata in anei sua ngaiin in a lanei nok anga leng rase.

³⁰Atuna achap ngaiin anngui lui om tho rase; atuna anni ngaiin, raisan lui om tho rase; anchok ngaiin a ta ang betok lai no rase.

³¹Atuna a donglua le ahui athei ngaiin ama donglua sina ahui ei theina man changlai no rase. Hi ramual hi atun ata asot adiar ranga nilai mak.

³²Mandonna tin ata nei zok u ranga keina zot u. In ala nei nok ngaiin Puma asin ruia a mandona, asik chu ama han hontinmo apuma matai thei ning atina.

³³Tenchu in anei sua ngaiin chu hi ramual neinun ruia amandona, asik chu hontinmo a nungak matai thei ning atina.

³⁴Havantin han lampui annina ahong rona. Ruathar ala lak nok nupang le nungak anthiangin Puma asin ruia amandon u na asik chu hontinmo a taksa le a ratha dali ang ei dar thei rang atina. Tenchu in anei sua nupang ngaiin chu hi ramual neinun ruia amandona asik chu a ruathar ei matai theina ranga han.

³⁵Nangni ngai satna ranga hiva chong ngai hi keina ril u ani. Nangni ngai keina khar u na ni mak. Hava ngai rathula nangni ngai nei tho u hi ei dik le atak ei ni theina ranga hanuk chu na pumpui u le ite alua ankhang abui thaka Puma asin athona om u ro.

³⁶Tu khatin mo a nainupangin om salui ei tho ti ariata hatuka a nungak tung anlen rang nek anten anang ten in ei nei ha asa, hava tak han pap ei tho ni pe no ni.

³⁷Tenchu tumo chu a malung rila ankhir tita, ite ananga anriat lui hatuka ei mandon ansum vat thei mi han in anei nok ranga a malunga ansin aniten arang asa sabak.

³⁸Hasik han in anei rang ati ten nei rase asa, hanuk chu in nei no ning ati nam havan ual ala sasa.

³⁹A ruathar adam sung chu a nungak ha ankhit ani, ten a ruathar athi pe sua ngaiin chu a ina ei zot tak pasal alak thei, tenchu a pasal lak rang ha Pumana aiam mi ni rase.

⁴⁰Hanum ni rase ha arongin ruathar la luia a om ten havan ual han achan asana anlon ti. Koi um atun hin Pathian Ratha aman sua anga kan betoka.