Read Ranglong 2 KORINTH 1 Bible Online

2 KORINTH 1 - Ranglong bible

2 KORINTH 1

¹Paul, Pathian ei zot zara Krista Isua ranga kuitir le hanuk koini na parual Timothi ata Korinth a Pathian kuibing a om ngai le Akaia rama Pathian mi anthiang a om ngai dora koma:

²Koini na Pa Pathian hanuk Puma Isua Krista ata lungkhamna le phukdaina na kom u na tung rase.

³Koini na Puma Isua Krista Pathian le Pa, alungkham alianpa, sanna dora ei anthokna Pathian koma raisanna ka mantung.

⁴Ama han koini nei antakna dorana ana leia san babang ani, hankeng Pathianin ha sanna ei na pek lehan koinim antaka a om na lom senkhat ngai nei va san theina ranga.

⁵Koini ngaiin Krista ei antakna ngai dora nei ansempui anga han Krista den amanga Pathianin sanna alian pangai ei na hong manchang ret.

⁶Hatuka na duk anaten hava tak ha nangni ngai sanna le zokna ranga keng ani zei. Hatuka sanna na chang ten hava ham nangni rang ngala sanna keng ani zei; hatuka hava ang sanna han antakna chu chungam phukanchual chunga adiar theina ranak ana pek ranga sin ei tho keng ani zei; hatuka hava ang antakna chu, koini ngaiin um atong keng na ni zei.

⁷Na chung u na koinin nei na lei sabeina anthol lai no ni. Koini nei antakna ngai dora nei na lei ansempui u anga koini kom atam sanna nei lei chang u ti nana riat pui.

⁸Asia rama na duk tong ngai ruia ka unai ngaiin ana riatpui u ranga keina zot u. Na ti ten na puak pel ngai hi alian le hanuk arik rahaia ala dam rang tenpeia ansabeina nei mathan sua keng ani zei.

⁹Nei mandon dana chu athi sua anga anbetok keng na ni zei. Na tak chung chipa anbelbo luia athi ata anthui thei Pathian chunga keng nei belbo zit ani zei.

¹⁰Tenchu ama den han hava dor peia thina rathatak ata ei na mazok ani, hatuka na la mazok um inti, hanuk ret chu hava sua lem na mazok ret bo ni atina ama tak chunga nei sabei kiar.

¹¹Hava han nangni ngaiin um bor azong chunga koini ana lei asan nei chang u. Havantin han mi tampa han koini ranga bor ei lei zong u na chu na masang nget unti. Hatuka Pathianin koinim na san bo ni; hanuk chu koini sika mi atampa raisanna antung ranga lei chang unti.

¹²Asik chu koini na borai thona chu hiva hi, koini naninga nei mandonna han ei na manriat chu Pathianin ei na pek anthiangna hanuk anrengna ngai ha miring hianna ang ni lui tana tenchu Pathian lungkham ranak lehan koini ngai hi ramuala hin hanuk chu abing pial reta han nangni lehan nei anzom.

¹³Nangni ngaiin nei iam le nei riat thei u rong hakeng nei hong maziak. Tenchu nei la hong riat u na nei la pom kiar u ranga ka na sabei u.

¹⁴Adik taka chu atun hin ituk ten mo chu nei na pom u na han koini na Puma Isua nikhua tika chu koini zara borai nei tho ngam u anga koinim na zar u na borai la tho thei inti.

¹⁵Hanuk chu ani nget rang khopa mandon achoia na kom u na ase bak ranga kei ansin asik chu avoi annina lungkham nei chang thei u na ranga.

¹⁶Makedoniana kei se na lama ana honga lut len u rang kei zot hava suale Makedonia ata ka honga kir tik lem ana honga lut ret u ranga kei zot.Hatuka Judai rama ka pan tik le nangnin nei na san nget thei u na ranga han kei mansuk.

¹⁷Hanle havantina mandon kei choia han kei annotna mo kei manlang ei chang rang ani zei? Hanoten taksa mandona kei mandon zit sika mo ka ranga “O, o” le “Mang, mang” ei anti rang?

¹⁸Pathian chu a iamrua ei ni anga nangni koma koini na chongsan ngai voikhat “O” voi khat le “Mang” ni ngai mak.

¹⁹Asik chu Pathian Sapa koini na Puma Isua Krista han koi le Sila le Timothi amanga na kom u na Pathian thang ana honga rilpu han chu voikhat le “O” hanuk voikhat le “Mang” ati ni mak. Ten Ama chu “O” ati Pathian ani.

²⁰Pathian chongtin dora chunga ama chu “O” ei ti ani. Hasik han Pathian ei anlalna ranga Isua Kristana koinin “Amen” nei tina ani.

²¹Nangni le koini Kristana munkhat anan chang ha Pathian ani, hatuka koini ngai abingtena anan hual um Pathian den ha ani.

²²Hanuk chu Ama han donglua aluak ranga mor puan anazempu ani hanuk ret chu koini na malung sunga Ratha Anthiang ha aman sumsial ei lei hong chang.

²³Ka ratha kei damna ana riatpu Pathian kei phuna keina ti ani u zei, nangni ngai le anlop duai kei zot tuara Korinth khua atun ten kei la se nokna ani.

²⁴Koini ngaiin nangni nei iam u na tak chunga anan chu ni mak me, haneka nangni na raisan u na bila na lom u keng na ni, asik chu iamna det chunga anding keng na ni u.