Read Ranglong 2 KORINTH 10 Bible Online

2 KORINTH 10 - Ranglong bible

2 KORINTH 10

¹Koi Paul Isua satna le lungkhamna nangni kom keina ril u ani zei, koi hi nangni kara chu annuai le hetel nangni kara ka om ten, tenchu ateia om le arang anti.

²Keina mathem u ani zei ka hong le a rang nang ret ning; asik chu kan riat ramual anga na om u ana ti ngai le a ranga nang ka ti.

³Ani ramual hin nei om, tenchu ramual sika nei put ni mak.

⁴Na kuttuk mang ngai hi ramual kuttuk ni mak, tenchu Pathian kuttuk keng adet nei masiam na ngai. Ankhalna, diklui ngai nei masiat.

⁵Ankhalna le ansang dora Pathian riatna alua ngai nei masiam andonna dora Krista suaka nei sin.

⁶Hatuka na mandang suale na hetel ha hetel luina dora athuan rang ansin inti.

⁷Neinun tualpang rong keng nei en. Krista ta ka ni atia anriat takin hiva hi atheia andon ret rase ama ha Krista ta ei ni anga koinim na ni.

⁸Puman ningneina ei na pek kan lianpuiam anzak makung nangni asin ranga ningneina ke ansiat ranga ni mak.

⁹Ka lekhana nangni nan phut u rang anga kei anlang nok ranga hava ha kei tho ke.

¹⁰Tulekin mo, “Paul a chong ngai ankhir sabaka, tenchu lungina ana ompui lai chu annema a hem ite ni mak!”

¹¹Havan tina miring ngai chunga, na pum abuia lekhana chong anziak ang taka na pum na om tikam na om lehan achung u na nei tho rang ani na.

¹²Ani, ansanga anriat ngai le chu ankhi no ma ni. Itukmo ei mo u! Atheia adingmun ansin u na ei anmai u na rang hatuka atheia anmai u!

¹³Ten koini chu nei anlianna hi adan khel no ni; Pathianin adan ei na sin pe khel no ni, hava ha na bil u na sin nei tho ha ani.

¹⁴Hasik han hava adan sunga nei ni sika na hong le hava ha khel no ma ni, ha Krista thangahui na hong choi le.

¹⁵Hasik han mi sintho adan neka khel ha lianpui makme, ha adan Pathianin ei sin ha. Nei iam u na ansona sin alian tak atho theia Pathianin adan ei siak tena.

¹⁶Hatuka ram ateiam thangahui va ril thei inti nangni khela hatuka mun ateia mi sintho anlianpui no ma ni.

¹⁷Tenchu Pathian chongin ei ti anga, “Borai atho zot tak chu Pathianin ei tho tak chunga borai tho rase.”

¹⁸Asik chu Pathianin asa ati le ke nei sa, na theia nei tina ni mak.