Read Ranglong 2 KORINTH 11 Bible Online

2 KORINTH 11 - Ranglong bible

2 KORINTH 11

¹Kei zot chu kei hian sua nok sikam na diarpui u, ataktaka nangnin nei na diarpui u ani na.

²Asik chu Pathiana lunghangna nangni ranga han ka malung ei anhang ani zei. Imo na ti ten koiin nangni hi nungakte sa tia makpa khat Krista kuta apek ranga kei anril pui ani zei.

³Tenchu song kei ankhar marul anga ei hianna le Evi ei huang hava anga na malung u Krista tianga anzik anthiang ata sial lam ving u ni.

⁴Angkhat pei honga hanuk Isua khat ret hong rila koinin nei ril nok tak ha ole nangnin nei pom u nok Ratha atei hanuk nangnin nei pom u nok thangahui atei aril ahong u le nei lei pom u rang hi ka ratha ta no ni mo?

⁵Asik chu kei zek hintin hin ha kuitir ngai ranga hin alakte ngal anthuai dap making.

⁶Tenchu arila ka tomam hanum hianna na tom making hava ha koinin alompeia mi dora bila na kom u na nei manlang.

⁷Ole, asia mo kei tho ni zei hi nangni nei anson u na ranga ka ninga kei zong lo buia na kom u na Pathian thangahui kei ril.

⁸Na haso u andom ranga kuibing atei ateia kei va pota lo kei lak.

⁹Hanuk na kom u na ka hong han hatik han kan sampitam tute puak arik chang making, ichangamo na ti ten Makedonia ata parual ngai ahong u na kei ansam ha a na hong zon u ataka lampui tina na puak u kei chang nokna ranga ka ninga kei anrung, anrung sa ka ti.

¹⁰Krista atak ka kom a om taka aniten hava han Akaia muntina tuten hi ka borai man bang thei u no ni.

¹¹Imo asik koiin nangni rang hi keina dit u nok tina mo? Pathianin a riat ka na dit u.

¹²Tenchu kei tho tak pei hi hava ha tho sa ka ti aher aman rang a zot ngai amani her man u kei machai thei u na rang amani a borai tho u na tak ha hava ha koini le nei anrualna rang.

¹³Ichangmo na ti ten hantin han kuitir rathol anra Krista kuitir ngai anga ei anliang u.

¹⁴Hatuka hava han chang andong rua ni mak ichangamo na ti ten Soitan aninga ra-ang anei vanpalai raliang le ei anliang.

¹⁵Hasik han ama akuitir ngaiin um adik kuitir ngai raliang le anliang hava ha ite ni mak amani chang rang chu, asin tho u anga han ni inti.

¹⁶Keina ti sir ani u zei tuten koi hi a mo na be u no rase, tenchu nana be u ten koi hi a mo tia ngal na pom u ro borai kei tho lak theina rang.

¹⁷Hiva chong kei ril hi Puma ei zot anga kei ril nimak tenchu hiana bui khat riat anga borai kei tho.

¹⁸Mi tampa han taksana borai a tho taka aniten ha han koi um borai tho ka ti.

¹⁹Ichangamo na ti ten nangnin naning u na ahian antina amo ngai ranga raisana chunga na doroi u.

²⁰Asik chu tulekin mo nangni hi suaka ana manchang u na ana sak u nan ten ana sura a na tuang u nan ten borai thona na maikhang a ben u nan ten nangnin doroi u ro.

²¹Koi hin pham lui poma kei ril ani zei koini na chuai lai um hanum angkhat peiin angam hava ha a mo anga kei chong ani zei kom hava ha ka ngam atia.

²²Amani ha Hebrai mo? Koi um haden, amani ha Israel mo? Koi um haden, amani ha Abraham achi mo? Koi um ha den.

²³Amani ha Krista hasondom mo? Amo anga kei ti, koi hi achalaka kei pong aliaklupa, lungina ankhuma, rikung buia raimol asak aliak lupa voi itukmo kei anmoi.

²⁴Juda ngai ata khep rangana khep somanthum lei akua ei na razik u.

²⁵Voi anthum sum razik, voi khat lunga deng, voi anthum rakuang akui kei tiar tin thuk sabaka sun khat zan khat kei dier.

²⁶Ka khual sena na voi hozet mo tina antaka, suam mang antaka, nam sika antaka, Jentail ngai koma antakna, khuana antak, philchara antak, tipuiliana antak, parual rathol ata antak na.

²⁷Apong le asola voi hozetmo mit akhu ansena von ancham le tin ral, sak man lui le adai le saikorong.

²⁸Hatuka rui tina chong om ta rase, ten rui khat a nikhuan tina ka tak chunga achul kuibing dora ranga andon lunghang.

²⁹Tu chuaia mo kei lei chuai nok, tu ei anbana mo kei lei kang nok.

³⁰Borai a tho a nang ten kei antakna ngai, kei chuaina ngaia borai tho ka ti.

³¹Puma Isua a Pathian le Pa ha umor taituana chanasa! Aman ariat milak chong ril makung.

³²Damaska na ka om lai han, Areta reng ei phun rama avengpun ana sur rang ana vala, Damaska mi khopui ei manrung ani na.

³³Hatuka kok khat le rakul kharpelepa ei na masuma hanke ama kut ata kei zok.