Read Ranglong 2 KORINTH 12 Bible Online

2 KORINTH 12 - Ranglong bible

2 KORINTH 12

¹Borai a tho ka ranga anang hava ha a sa chu ni maka, tenchu Puma ei anralna tin le ei na mantheina chong ril ka ti.

²Koiin Krista na anngat mi khat ka riat kum somleimanli ani zei, taksa pum le mo chu re makung taksa buia mo chu re makung. Pathianin ariat hantina mi han van anthumna tenpei antuang.

³Hatuka hava miring rui ha ka riat taksa le mo taksa nok le mo hava ha re makung Pathianin ariat.

⁴Ama ha Paradisa antuanga anril lui chong ava rangaia hava ha miringin ei ril rua ni mak.

⁵Havan tina miring ranga borai tho ka ti tenchu ka ninga ranga borai tho no ning kei rat nokna ngai tina borai tho ka ti.

⁶Ataka chu borai ka tho zotam amo ni no ning asik chu ataka ril ka ti hanum kei tho le kei ril ngai sika ansanga tuten ei na be nokna ranga kei bang chian ani na.

⁷Hatuka ha chongpek ha achan ei lian sabak sika koiin alakte ngal borai tho ning hava sika han ka taksa na raling khat Soitan apalai khatin ei na man ama han hanke ei na zum rapa alakte ngal borai kei tho nokna rang.

⁸Hava rui lehan Puma kom voi anthum kei zong hava han koi ei na mathan na rang.

⁹Hatuka aman ei na ti: “Ka lungkham hi na rang a hun keng, asik chu ka ranak hi rat luina na ei anlang.” Hantin han koiin hanek ten a chalaka raisan sabaka kei rat nokna tina borai tho ka ti Krista ranak ka chunga ei om theina ranga.

¹⁰Hava sika ha Krista ranga rat luina tina, maimok, ansamna, anrahokna, anokna, ka tong le kei nuam, ichangmo na ti ten ka chuai tik pei kei rat.

¹¹Amo kei anlo nangnin ka ranga hava ha nei na man nang u. Asik chu koi hi nei na manpak dan u ke ba. Ichangmo na ti le ite ka ni nokam hanum ha kuitir dulidon ngai ranga hin alakte ngal nuk anta making.

¹²Kuitir ngai ei andangna dora nangni aleia diar kiar tit chunga andangna sin chang dong khap anriatna le sinthotheina lehan ei antho.

¹³Ril u ta kuibing atei ngai dora neka hongamo nei hek siai u? Koi kaninga nangni na manpon u makung hiva kei masial hi na madual u ro.

¹⁴En uta, hi voi anthum pei ani zei na kom u na ase rang kei ansin. Hatuka na pol u no ning, ichangmo na ti ten koi hi na neinun u val ni makung, nangni hake kei na val u asik chu nai ngaiin nupa rang nei manting ngai mak nupa ke nai rang ei tho.

¹⁵Hatuka a chalaka raisan chunga nangni nei damna na nuk u rang sika thama tham sabak ka ti achalaka ka na dit u taka anten hava han alakte mo kei chang rang?

¹⁶Azozot ni rase na puak na manrik u makung tenchu zia manga mo a huanga mo keina sur u.

¹⁷Nangni na kom u na kei hong tir u ngai ha amani lehan tulek le mo han ka na huang mo u?

¹⁸Tita ha kei mathem hatuka ama abila ha parual ha kei tir Tita han ei na huang u mo? Koini hi ratha angkhat, ke nuk angkhata kal achoi ni mak me mo?

¹⁹Atun tenpei nei la mandon u, koinin na kom u na asia hengna rang chong aril ranga, koinin Pathian a makunga Krista na chong nei ril hatuka andit aruai ngai, na lom u na aphun ranga chong nei ril.

²⁰Ichangmo na ti ten ka chi, ka honga suak le lam keina mu u zot anga mu luia na mu u ning hanuk nangnin nei na mu u zot nok anga lam na mu u ta ni, ansual, khamaret, takasi, ansukna, siat anril na, achiar, malung alian, anbuaina ngai a om thei ti hi.

²¹Ka hong ret tik le Ka Pathianin na kom u na na manboka hanuk mana asia ei tho u na sin annim atho uiare le omchang lui ruia, ansir lui hava mi tampa ranga chap lam ning.