Read Ranglong 2 KORINTH 2 Bible Online

2 KORINTH 2 - Ranglong bible

2 KORINTH 2

¹Hasik han ka malunga kei ansin chu nangni koma ahonga kir reta na malung anna u ranga zot lai makung.

²Asik chu na malung u ka mannan le tumo koi ka rai anan san rang? Ka sika amalung annapu rong ha keng ei ni rang ni zei ni.

³Hasik han ka la hong ret anten chu ka rai anansan rang ngai chunga lungnana ei suak lai nokna rang mandon achoia hiva lekha anziak nadan kei hong suakna ani. Asik chu ka rai asan le nangni ngai doram na rai san nget unti ti hi kei iam ani.

⁴Antakna tampa le malung ana chunga le mit rathi zan chunga na rang u kei maziak, nangni malung natna anapek ranga ni mak, tenchu na rang u na keina dit u ei tamzia ha nei riat thei u na ranga kei maziak ani.

⁵Atun hin tu khatin mo mi malung manna sela hava han koi ka malung ni mak ei manna tenchu loko malung keng ei manna. Eihekkhitna na ngal ama ranga ankhir pana anlo rang azot ni makung.

⁶Mi tampa han duk ei sak ten ngala hava ang mi han duk ei tong ha ama ranga chu ahun.

⁷Hasik han, ei zozot ni rase, ama nei madual u le a ak nei mathui u ha aranga asa keng, hanoten a malung ana sabak lem aloma a mathan lam zit ving ret ngai.

⁸Hasik han nei madit u na tatak ha anriat ranga keina mathem u ani zei.

⁹Hiva lekha kei hong maziakna asik tak chu nangni ngaiin ituk ten mo ansinna lampuia nan ding tit thei u zei ti le keina manchu u na lama ituk ten mo hetel rang nan sin u zei ti ariat rang kei zot tuara ani.

¹⁰Ei masial sika mi nei madual u tak ha koiin um ka lei madual. Asik chu koi um kei madual thei a om vingam nangni ngai sika Krista matona kei madual chang len rase.

¹¹Soitanin koini ngai chunga achan ei sa thei lai nokna ranga han; asik chu aman ei mansuk ngai dora hi nei riat pe nok ni mak.

¹²Krista thang ahui ava puang ranga Troasa ka va tung suale chu Puman hava han sin atho ranga ka matona suakkhar ana malong pena ka muna.

¹³Tenchu koini na parual Tita ha kei va mu nok sika han achalaka andonna ka va suaka. Hasik han havana mipui ngai ka mathan sua u le chu Makedonia tiang ka pan.

¹⁴Pathian chu anpaka om rase! Asik chu koini ngai Kristana munkhata a om chungin Pathianin Kristana han azui theia matona ei na manpan hatuka Pathianin Krista ruia hianna marim ahui koini ngai amanga muntina ei na manpuang ani zei.

¹⁵Asik chu azokna aman sua ngai ranga le anpeia ase rang ngai aninin koma koini ngai hi Pathian tiang chu Krista ranga amarim ahui khit ang na ni.

¹⁶Anpei ngai ranga chu kiang khata athi rak thei tenpei marim asia, tenchu atei ngai ranga adam theina marim ahui ret ani. Hanle havan tina ani thei rang tumo nini?

¹⁷Mi atei ngai anga koinin chu annem sabaka Pathian thang anthek ni mak me, asik chu Krista suak nei ni anriat chunga anzik zata le Pathianin ei na ti anga achong ranga ahong antir keng na ni.