Read Ranglong 2 KORINTH 3 Bible Online

2 KORINTH 3 - Ranglong bible

2 KORINTH 3

¹Koini hi naninga borai atho nei phut reta hin asa ani mo? Hanle mi atei ngai anga nangni ngai chunga mo nangni ngai ata satalona lekha koinim mo nei la nang rang?

²Nangni ngai len ha koini na lekha mathuan na ni u, koini na malunga anziak lekha pek, hava tak ha mitinin ei riat le ei ena ei ti thei.

³Adik taka chu Krista han aning lena lekhan thuan ei maziak, hava ha. Koini han anthuan raming nei raput ei chang. Hava lekha ha lekhan ziakna ti le anziak ni mak, Pathian adam Ratha le anziak ani, lung tapa anziak ni mak, tenchu taksa malung tapa anziak ani.

⁴Hivantina koinin nei tina asik chu Krista zara Pathiana iamadet nei hong don thei sika han.

⁵Hiva ang sin atho theina ranga theina le thiamna ite koinia om mak, tenchu atho theina azia aphak chu Pathian ata anthok ani.

⁶Ama nget han Dan athara suak ei na manchang, hava ha dan anziak anga dorbondom rang ni mak tenchu Rathana dorbondom rang ei na manni. Asik chu dan anziakin ei hong mazir chu thina tenchu Rathan ei mazir chu damna ani.

⁷Thina Dan lunga ankhuara anziak ngal um anpek lai han Pathian lianna anlanga, hava ha Mosi maisua ei el duai ngal ha Israel mipuiin en thei u mak. Thina Dan ngal um hantin han rali anphur thei ani, tenchu hava ei elna chu nuka ahonga heka.

⁸Havantin aniten ichangmo Rathan ei ruaina vang chu ei el sa nok rang ati?

⁹Demkaina hasondom lua mana a el thei tak ten sandamna hasondom vang chu hotukmo ei rat rang ani na.

¹⁰Asik chu, machin han chu ei el na lehan ei anlianna ei chang tenchu atun hin chu machina ei el na le ei anlianna ang ha ahonga bang zeia.

¹¹Asiata ase rang lua mana ituk ten mo chu a el thei tak anten taituana a om rang vangin chu ituk aliana mo ei anlal rang la ni intia.

¹²Koinin hiva ang sabeina nei hong dona hin, achalaka ranak nei hong nei ani.

¹³Koini chu Mosi anga tho no ma ni. Ama chu amaisua ha ei thup ani, asik chu Israel mipuiin amaisuana ra-ang ei chuai le ei hek tira ei anpei rang ha ei mu u nokna ranga han.

¹⁴Hava ten ngala han amalung u ei ankhir ha abang pe la ni u mak. Rui maruana anziak anga avian tena hin amaisua ei thup u abang la ni mak, Krista le anzom ngai doran chu amai ei malong ani zei.

¹⁵Tenchu aviana nikhua tenpeia Mosi Dan bu aphong u le amalung u ha ei la dar chian u ala ni.

¹⁶Ten amaisua u anlia ei ankhai pe u na ranga Mosi ruia lekhabuna ei ti ang chu; “Pathian tiang chang anhoi u le amaisua adar chu ankhai inti.”

¹⁷Hivana anziak anga chu atun hin chu “Pathian” hakeng Ratha, hatuka Pathian Ratha ei om na tak chu na rachama alengna ham ei om.

¹⁸Ten koinin chu na maisuana ite ana dar abui thaka Puma ra-ang chu, dapona nei mu anga, hava ha Puma le Ratha ata ra-ang ata ra-ang nei mu thei ang mel tak lehan naninga anthul tir na ni zei.