Read Ranglong 2 KORINTH 4 Bible Online

2 KORINTH 4 - Ranglong bible

2 KORINTH 4

¹Pathian alungkham ei na manchang anga ama dorbo nei adoma hin, na dok manchuai mak me.

²Haneka anzakpui aruai maruk sin ngai dora chu nei heng keng ani zei, mi ahuanga le Pathian chong buanruang anse nilai mak me, tenchu atak anlang chunga Pathian le miring ei theina na naninga maton chipa asa nei anlo theina ranga nei val.

³Asik chu, koinin thangahui nei ril hi ankhar ten, atuna anpei tira ase ngai ranga ankhar ani.

⁴Pathian mel anput Krista ha, ama ei anlianna thangahui ra-ang chu achung u na ei el thei lai nokna ranga han hiva huna salui Pathian ei iam thei u lai nokna ranga a malung mit ei mancho pe ani.

⁵Adika chu, koini na ranga nei ril ni mak, tenchu Krista Isua ha keng Puma atina nei ril hatuka Isua sika han keng koini ngai him na suak u atia nei anbelbo.

⁶Asik chu ha Pathian han, “Azing kar ata ra-ang la suak inti,” ei ti, hanuk Ama len han koini malunga ra-ang ei na man el pe asik chu, Krista amela han Pathian ei lianna le ei hianna ra-ang ei anlang theina ranga.

⁷Tenchu hiva ratha donglua adon koini hi akui thei neinun ang na ni, ranak anei khit apuma chu Pathian ani tenchu koini ata anthok ni mak ti ei na manmu na ranga.

⁸Antaka na om ngalam, rathatak ansak mak me. Na malung songankhar nikhuanam na boidong mak.

⁹Min ana rahok lai um nisela na lom abuia om mak me; min ana masul lai um nisela zoia siat mak me.

¹⁰Isua ei damna tak ha koini taksa nam ei anlang theina ranga hiva taksa lehin Isua ruak nei pela nei chei pui ani.

¹¹Na dam sung nikhuana Isua sika athi anga nei anbelbo asik chu hiva taksa ngetam Isua ei damna ei anlang theina ranga.

¹²Hiva a omzia chu thina han koinia sin ei tho, tenchu damna han nangnia sin ei tho ani zei.

¹³Haneka hava iamna ratha ha koini kom a oma; Lekhabuna anziak anga, “Ka iama hasik han achong ka theia.” Hava anga han koini ngaiin um na iama hasik han achong um na theia.

¹⁴Puma Isua anthuipu han Isua bila koini ngai um na la mathui kiar inti, hatuka nangni ngai bila ama ham la hong manding inti ti hi nei riat.

¹⁵Asik chu, alompeia nangni ngai ranga keng; hankeng Pathian lungkhamna mitin kom ei changa Pathian ei anlianna ranga mitinin achalaka bor azonga raisanna ei man tung theina ranga.

¹⁶Hasik han na dok manchuai mak me na; haneka taksa mi nei nina achuaia asiat tir ngalam na sunga ratha mi chu anikhuan tina alei athar ani.

¹⁷Hatuka, atuna asin te ngai le hun anaite rang khopa antak na tiar ngalam hava antakin ama alungkham ei anthukna lehan koini na ranga umor tenpeia ranga alian sabak anlalna ei mansuk ani.

¹⁸Koini ngaiin chu aloma nei muthei chunga valna don mak me tenchu nei muthei nok chunga keng valna nei don. Asik chu, neinun amusa dora hi chu asot diar no ni tenchu neinun amu salui dora hi keng umor taituana adiar rang.