Read Ranglong 2 KORINTH 5 Bible Online

2 KORINTH 5 - Ranglong bible

2 KORINTH 5

¹Koinin nei riat khat chu, hiva puanin anga na pum phil in hi siat ngal sela Pathianin koini nei omna rang vanrama in khat adona, hava in ha ama aninga umor taituan tenpeia ranga ei sin.

²Adiktaka chu atun hin hiva puanin ata nei ankhek ani zei, hiva chunga vana koinin na in lua rang han ei na hong khum ranga hin achalaka nei lei sabei ani.

³Hava in han ana hong khum le chu saikoronga om lai no mani.

⁴Hanuk adika chu, hiva phil chunga puanina nei oma hin na puak ei rik sika nei ankhek ani zei. Ramual taksana a om rang azot ni lai mak me, ten vanrama a ompu han koini na chunga na hong khum ta rase ti hi nei zot ani zei, asik chu hiva athi thei taksa damnana ei anlet theina ranga.

⁵Havan tina ani rang ngala ana sinpu ha Pathian ani; hanuk ama Ratha ha koini ngai ei na pek, ha Ratha koini na ranga chu man anbe ei lei ni.

⁶Hasik han, a ngam mi nei ni babang. Hi taksana na om sung chu Puma a in ata alan kar keng na la ni ti hi koinin nei riat.

⁷Asik chu, apanga nei muthei chunga ni maka tenchu iamna le keng kal nei choi.

⁸Hiva taksa in amaka Puma a ina ava om ranga hin anthang ngamna hi alian sabaka na mandona.

⁹Hanuk rui khat ret chu na rama mo na om ole ram ateia mo na om aman ei na dit rua anga nei om theina ranga nei tho sabak ani.

¹⁰Asik chu, koini ngai dora hi Krista ruirilna matona nei la vanding kiar rang ala ni; na sin tho asa asiat koini ngai angkhat angkhata na sin tho anga hi na taksa han ei lo amara chu nei la va man rang ala ni.

¹¹Hasik han, Puma anchi a omzia hi mitin koma nei manriat ani, tenchu Pathianin ei na riat sunga a om kiar na ni; hanuk ret chu, koi um nangni han nei na riat sabak u keng ka ni ti sabeina ka dona.

¹²Nangni ngai koma athara kei dikna ana ril ret u ranga azot ni makung, hanek ten koini rathula nangni ngai han borai nei lei tho thei u na ranga chanasa nei na pek ani; borai atho ngaiin a malunga tho lui tana a maton taka borai tho rase, amani ngai nei masang thei u na ranga han.

¹³Asik chu koini ngai na uk khap ten hava ha Pathian sika keng ei ni, hatuka achan na hian ten hava ha nangni na ranga keng ei chang.

¹⁴Asik tak chu, Krista a lungkhamna han koini ngai ei na vong keng na ni zei; mitin rathula mi angkhat ei hong thi, hasik han mitin ham athi zit anga koini ngai han rui nei ril ani.

¹⁵Ama chu mi dora ranga ahonga thina; asik chu atuna adama ala om ngai hi ama aninga ranga adam ni lai no nia tenchu mi dora ranga athina anthuiretpu sika adam ei chang theina ranga han.

¹⁶Hasik han, atun tena hin tute hi taksa anga han belbo lai mak mena. Krista ha taksa anga na hong belbo ngalam atun chu hantin han belbo lai mak me.

¹⁷Mi tukareng Krista le anzom ten ama ha mi athar liai keng ani zei; rui marua ngai dora chu aliam sua zei; en u ta, hava ngai dora ha athar zit zei.

¹⁸Hatuka hava ngai dora ha Pathianin ei tho ani; Krista zara ama ha koini ngai lehan ei nan ngoi pui ret ani zei, hatuka anngoina thona sin koini ngai hi ei na pek.

¹⁹Ataka chu Krista zara Pathian han hi ramual lehan anngoipui reta; ei masial u ngai chu amani masial anga ngal belbo pe maka; hatuka hava anngoina thang ha aril ranga koini na kom ana betok.

²⁰Hasik han, Krista rathula koini ngai hi reng palai sin atho nei chang. Pathianin koini amanga ei na zong anga koini ngaiin um Krista rathula nei zong chu nangnin Pathian le anngoi ret u ro ti ani.

²¹Masial don thak lui ha koini ngai sika masial adon anga abelbona; hankeng amana han koinim Pathian mi anthiang anga changai nei don theina ranga.