Read Ranglong 2 KORINTH 6 Bible Online

2 KORINTH 6 - Ranglong bible

2 KORINTH 6

¹Pathian le lokona sin nei thona hin, Pathian lungkhamna chang ngai nana mathem akoronga manse u no ro.

²Pathianin imo ei ti rangai u ro: “Asan ranga na nang u tik, ka na riat u; anzok na nang u na ka na san u.” Rangai ro! Atun hi hun asa chu ani, atun hi zokna nikhua chu ani!

³Na sin thona tuten masial adon ving zot mak me, hasik han tute lua no rei nei ti.

⁴Hanimaka, nei tho rina Pathian suak nei ni na manlang phukanchuala, antak adiara anpon le anpina.

⁵Raimol na saka, lungina nan khuma hatuka ansualna na achalaka sin ranak thona, in thei lui, bu ngoia nei om.

⁶Nei anthiangna le sia le sariatna le, phukanchual le lungkhama Pathian suak nei ni nei manlang koini koma Ratha Anthiang le koini koma lungkhamna dik le,

⁷dikna chong nei rila Pathian thotheina le, anthiangna ha na kuttuk anga amanga, aduina le anrungna ranga amanga.

⁸Min lalchim ana tho, elsel um ana mu, na siat um anril, ananpak um a om, milak nei anlo tenchu adik nei ril,

⁹melriat nei lui anga tenchu mi doran ei na riat, athi anga nei ni tenchu nei dam, ansinsakana omam thi mak me.

¹⁰Lunghang na ninam na rai asan, anriang ang chu nei ni tenchu mi tam nei man nei; ite bui nei ni tenchu nei don kiar.

¹¹Korinth a ka mal ngai! Nangni kom azar zita nei ril; na malung aliana nei malong.

¹²Koini nimak malung athup; tenchu nangni keng na malung akhar u.

¹³Atun hin ka nai anga keina chongpui; havantin anga nangnim malung vong u ro, koini rang na malung aliana malong u ro.

¹⁴Aiam nok ngai le anruala sin tho u no ro, asik chu ni thei ngai mak. Hontinmo adik le dik lui ei anlop rang? Hontinmo azing le avar ei anlop thei?

¹⁵Hontinmo Krista le soitan anpom ni? Hontinmo aiam iamlui ngai le anrual ni?

¹⁶Hontinmo Pathian biakin le ramil biakna anngoi ni? Asik chu koini hi Pathian adam a biakin na ni. Asik chu Pathian apum lenin ei ti. “Ka mi ngai bila ka in sin ka ti abil u na leng ka ti; A Pathian u ni ka ti, ka mi ni unti.”

¹⁷Hasik han Puman ei ti, “Mathan ro amani kom ata ankhai ro, annim le ite tho no ro, hatuka na pom ka ti.

¹⁸Na pa u ni ka ti, ka naipasal ngai ka nainupang ngai ni u na ti, Puma Athotheikiarin ati.”