Read Ranglong 2 KORINTH 9 Bible Online

2 KORINTH 9 - Ranglong bible

2 KORINTH 9

¹Juda rama Pathian mi ngai sanna ruia nei mathuan u rui na kom anziak nang maka.

²Ka riat asan rang na zot u, hatuka nangni sika kan lianna Makedonia na mi ngai kom. “Akaia na kuibing ngaiin nikum ata anasan rang ansin nei zot u na han mi aman har.”

³Atun hiva kuibing ngai hi nei hong tir nangni sika nei nan lianpui akorong chang ni nei ti, tenchu kei ti anga nangni koma sanna lehan lei ansin u ro.

⁴Hanum nisela Makedonia mi ngai ka bila hong rang aninam hatuka nei lan sin u nok ahong mu u nam nangni nei anzak apei vinga koini itukmo nei anzak rang asik chu nangni sika nan iam sabaka!

⁵Hasik han parual ngai ha man uala nangni koma hong tir ka tinga, mana chong antin sua apek ranga nei lei ansin u ha ansuk chita alei ansin na rang ananthem u ranga kei sabei keng, hantin han anpam chunga pek niluia manar luia apek chang inti.

⁶Ten havan tiang han nei athek atom ten nei at um tom inti, nei athe atam ten nei at um tam inti.

⁷Mi doram manar chunga pe luia apek nget ananga apek ni luia a malunga ei derdin anga pe rase; raisan taka apek rong ke Pathianin chu ei adit.

⁸Hatuka Pathianin lungkhamna dora na chunga a vur thei, hantin han nangnin ahun baka aneia sin asa dora atho rang don thei u na ti.

⁹“A sema anriang ngai kom apek, ei sana chu umora a om ke,” ti anziak ang.

¹⁰Hankeng a tupu ranga chimu pekpu le anek rang sak a zonpu Pathianin nangni na ranga chimu na pek unti aman na maphung tir unti.Aman nei dik u na mara chu na manson tir unti.

¹¹Na mannei inti aphal taka apek ranga, mi tamin nei pek ngai koini kom aman ule Pathian manpak inti.

¹²Hiva sin nei tho u na Pathian mi ngai ei nang u rong nei zon u ni maka ten Pathian lungkham nei manlang u ani.

¹³Hatuka hiva na sin tho unan ei manlangin mi tamin Pathian manpak inti thangahui sika nei dik u na zara ha nei ril u chachak ha, hatuka aiamrua taka mi dora rang nei sem u chachak ha.

¹⁴Hasik han malung rila nangni rang borzong unti asik chu Pathianin lungkham aliak ei na manmu u sika.

¹⁵Pathian kom raisan chong ril u rei hiva manbui pek ei na pek sika!