Read Ranglong GALATIA 3 Bible Online

GALATIA 3 - Ranglong bible

GALATIA 3

¹Nangni Galatia na achang ngai! Tumo chong ana thuang u? Na mit mu u ngeta Isua Krista ha Krosa ei antar.

²Hiva khat hi na ril uta! Dan ei nang atho na mo Pathian Ratha nei chang u ole thangahui ariata a iama mo?

³Ichangamo achan nei chang u! Na ranak le asua rang nei ti u. Pathian Ratha hena nimak mo nei phut u?

⁴Nei riat u ngai ha akorong mo? Hongmo khat chu ani!

⁵Pathianin Ratha ei na pek u sika boidong sin ei tho hatuka Dan nei zi u sika ole thangahui nei riata nei zi u sika mo?

⁶Abraham ha mandon u ta Pathian chongin ei ti anga, “Pathian ei iam hatuka iamna sika Pathianin mi anthiang anga apom.”

⁷Hasik han Abraham akhuk ngai tatak chu aiam ngai ke.

⁸Pathian chongin alei ril Pathianin Jentail ngai le ei anngoi rang chu iama ke. Hasik han Pathian chongin Abraham akoma thangahui ei ril: “Nanga mi dora borsang tung inti.”

⁹Abrahamin a iama borsang atung hantin han a iam dora chu borsang atung ama anga.

¹⁰Dan thuaia anbetok ngai chu khomaka om; asik chu Pathian chongin ei ti anga, “Dan anziak dora tel lui chu Pathian khomak thuai om!”

¹¹Atun chu anthiang phat Dana tute, Pathian le anngoi thei mak; asik chu Pathian chongin ei ti, “Iamna le Pathian anngoi pui ngai rong ke adam rang.”

¹²Hasik han, “Danin iamna le ite ei tho rang om mak, hava ngai anga athopu chunga han dam inti ke,” ei ti.

¹³Tenchu koini na rang khomak atunga Kristan ha khomak atunga Dan ata ana ratan; asik chu Pathian chongin ei ti, “Thinga anthoi tak chu Pathian khomak atung.”

¹⁴Kristan hiva hi ei tho, borsang, Pathianin Abraham koma ei tin ha Jentail ngai kom ei anpek theina ranga Krista Isuana, iama Ratha nei chang theina rang Pathian chongtin.

¹⁵Ka lom ngai, anikhuana rui le ankhina tho ka ti; rui khata mi anni azota a maziak u zei tuten manchai thei mak, sap thei mak.

¹⁶Atun chu Pathianin Abraham kom le akhuk ngai kom chong atina. Pathian chongin “atampa” timak tenchu “angkhat,” hava ha Krista.

¹⁷Kei ti zot chu Pathianin Abraham akom chong atina arung. Ha Dan kum raza manli somanthum suale anpek ha chai thei maka Pathian chongtin siat thei mak.

¹⁸Asik chu Pathian pek ha Dana anbetok aniten, chongtina anbetok ni lai mak. Tenchu achongtin sika ke ha pek ha Abraham akom ei pek.

¹⁹Hanle ha Dan ha imo asik? Hava ha ansap asia asa mu theina rang, hatuka hava ha Abraham akhuk ahong tenpei ei diar rang ha chong ei tin pu kom han. Ha Dan ha vanpalai ngai amanga palai kuta anpek ei ni.

²⁰Tenchu palai nang maka mi khat anchel ten; hava ha Pathian chu angkhat.

²¹Hanle Dan hi Pathian chongtin adui mo? Ni mak ni thakma! Min Dan hi damna ranga ei man nisela ha Dan atela mi dora Pathian le anngoi zei ni.

²²Tenchu Pathian chongin ramual dora pap thuaia ke ati; hasik han achongtin, ha pek ha a iama ke Krista a iam ngai ranga.

²³Tenchu iamna ani man han Danin lungina ankhum anga anakhum iam ahong anlang man tenpei.

²⁴Hasik han Dan ha anasur ei ni Isua hong man kar iama Pathian le nei anngoi theina rang.

²⁵Atun chu iamna hun ani zeia Danin ei na ruai ni lai mak.

²⁶Iamna na na loma Pathian nai ngai nei ni Krista Isua na.

²⁷Kristana baptisma achang dora chu Kristana anthuam na ni u zei, ataktaka chu Krista damna hake ani zei.

²⁸Hasik han Juda Jentail ite ei anteina om lai mak suak ankhit le azok, nupang pasal nangni hi nei dam u na Krista na munkhat.

²⁹Krista ta na niten Abraham akhuk na ni hatuka Pathianin chong ei tin ha manin na ti.