Read Ranglong GALATIA 6 Bible Online

GALATIA 6 - Ranglong bible

GALATIA 6

¹Ka lom ngai, mi asiat atho lai tak ansurten ratha mi ngaiin ansa retna tho rase; ten annuaia tho rase. Hatuka nang um anrung ro, nang ham anthem ta ni.

²Na puak u ngai ansan ansiat u ro, hantin han Krista riti tel u na ti.

³Ite ni luia mi lian ka ni na ti ten na theia anhuang ke na ni.

⁴Na theia na om u ha anzek u ro. Asa ten nanlian thei imo nei tho ha, mitei ei tho le ankhi luia.

⁵Na theia na puak pel chip u ro.

⁶Pathian chong anril na ni ten, ananchupu lehan aloma asa dora anril u ro.

⁷Na theia anhuang no ro; tuten Pathian huang thei mak. Nei ling tak ha at na ti.

⁸Nang nei zot anga na ling ten, havan ata athina at na ti; Ratha phaia na ling ten, hava Ratha ata taituan damna atin na ti.

⁹Hasik han asa tho ranga mahuat u no rei; na mak rak nok ten, ahun la hong inti hatika la at inti.

¹⁰Hasik han her na mantik pei mi rang asa nei tho rang hatuka antei vinga iamnana na inko mi ngai koma.

¹¹En u ta anziak alian pangai nangni rang ka kut le ka maziaka.

¹²Vun at therkhakhaka ana ti u ngai chu pang tiang ruia anmu zot ngai ke. Ei tho u ha Krista Kros sika duk ei teng u nokna rang.

¹³Vun at amang ngai len ha Dan zi u mak; nangni ha vun at u rase ana ti u amani han taksa ruia aser khukha nei tho u rila anlian u thei hava ha ei val u.

¹⁴Ten koi chu Kros rui rong ha anlian pui ka ti; ama Kros zara ramual chu ka rang athi ke, hatuka koi hi ramual ranga ka thi.

¹⁵Vun an at mo atmak mo ite nimak; tenchu athar ansin hi ke.

¹⁶Hiva riti azi ngai rang phukdaina le lungkhamna om rase hatuka Pathian mi ngai dora koma.

¹⁷Ei hekna na: Tuten na manpon lai no rase, asik chu ka tak chunga duk ngaiin Isua andangna ei raput sika hin.

¹⁸Puma Isua Krista lungkhamna na lom u kom om rase, ka lom ngai. Amen.