Read Ranglong EPHESI 1 Bible Online

EPHESI 1 - Ranglong bible

EPHESI 1

¹Paul Pathian zota Krista Isua zolai akoma Ephesina Pathian mi ngai Krista Isuana a iamrua ngai kom;

²Pathian koini na Pa le Puma Isua Kristan alungkham le phukdaina na pe u rase.

³Tho Pathian le Puma Isua Krista a Pa kom raisanna ril u rei! Krista zara ratha borsang dora ana pek van ramuala.

⁴Ramual ansin man, Pathianin ei na thang sua ke Isua Krista zara, amatona anthiang le masial abui ranga, asik chu ei na dit ani na.

⁵Pathianin ei masat sua Isua zara anai ngai ei na manni rang hiva hi ahuia ei riat le ei derdin.

⁶Tho Pathian manpak u rei alungkham ei lian sik hin manbui peka anai madit ei na pek hi.

⁷Asik chu Krista thisena koinin zokna nei man, hava ha, na pap ngai ei andual. Pathian lungkham hi itukmo ei lian.

⁸Hava ha koini rang aliana ei na pek! Ei hianna dora le riatna le.

⁹Pathianin ei derdin ha ei tho sua, hatuka ei na manriat ha a derdin anthup ha aman ei masat sua Isua Krista zara.

¹⁰Hiva derdin hi Pathianin suanti a hun ani tik ansin dora munkhata asiaka anvan le phil chunga hatuka Krista alu khita.

¹¹Aloma Pathian mansuk ang le ei masat ang ke ei ni; hatuka Kristana koini ngai ei na thang ama ami ngai ranga asik chu ama derdin sika aphut len ata aman imo ei masat anga.

¹²Tho hanoten Kristana ansabei mansa ngai chu Pathian lianna manpak u rei!

¹³Nang um Pathian mi ke nei hong ni; Pathian chong adik na riat tik chu, ha thangahui sandamna ana honga pek. Krista iam ro hatuka Pathianin ama silmor apuma nina na zem inti, ha Ratha Anthiang ei na pek aman chong ei tin ha.

¹⁴Ha Ratha ha chongdetna koinin Pathian chongtin ha nei man rang atina ami ngai ranga chongtin, hatuka hiva ngai hi aiam ngetna ani Pathianin zokna pe inti ama mi ngai chu. Tho ama lianna manpak u rei!

¹⁵Hiva sik hin, Puma Isua nei iam u Pathian mi ngai nei adit u,

¹⁶hasik han nangni sika Pathian koma raisan chong aril bang makung ka borzonga na mangil u makung,

¹⁷hatuka koini na Puma Isua Krista a Pathian ha Pa lian han na man hian u na Pathian na manmu u rase, nei riat u theina ranga.

¹⁸Na malung u anlong rase atia ka zong a ra-ang nei mu u theina rang, ha sabei ha nei riat theina rang ei na paina asik ha itukmo tichang ei buia borsang ngai ami ngai ranga a chongtin.

¹⁹Hatuka itukmo ranak ei nei koini tak chunga sin ei antho aiam ngai kom. Tho theina ha ranak anei ang keng ei anrual.

²⁰Hava ha ei mang Krista athi ata amathui lai han hatuka achang tiang aman suta van ramuala.

²¹Krista ha amana rui aril ngai lima aliankhit, chongneina, thotheina le Puma ani; a nina ha nina ngai dora ranga ansangkhit hi ramuala le, ramual ala hong ranga le.

²²Pathianin Krista ke thuaia aloma asiak hatuka kuibing ngai kom Puma ansangkhita apek alompei chunga.

²³Kuibing ngai hi Krista taksa, alompeia ei mansuana ansua muntina.