Read Ranglong EPHESI 2 Bible Online

EPHESI 2 - Ranglong bible

EPHESI 2

¹Machin chu rathana athi na ni hetel lui le pap sika.

²Hava lai han ramual siatna tiang nei ro; ratha ranak tiang nei ro; ratha ranak ha thinthina ha nei zi, ha ratha atuna Pathian tel lui ngai asur.

³Ataka chu amani ang nei ni na piangpui ei zot nei zi, taksan ei zot ang nei zi hatuka na malungin ei zot ang, nei anzirpui anga chu amani ang na ni, Pathian taksitna atiar rang nei ni.

⁴Ten Pathian lungkham chu itukmo ei tam hatuka itukmo ei na ditna ei lian.

⁵Rathana na thi lai tak han he nei tel nok sika aman Krista zara damna ana pek. Pathian lungkham sika ke zokna nei man.

⁶Krista Isuana han ei na mathui abila rui aril ranga anvan ramuala.

⁷Hiva ei tho hi hun aleia hong zel ranga hin Krista Isuana koini na chunga itukmo lungkham ei na muna ei tam Krista Isuana hava ha ei na manmu.

⁸Pathian lungkham ha nei iam hatuka zokna nei man. Kalvarina sim han nei iamna ei van chuan.

⁹Lungkham sika nang hi iama nei zok; nang na theia nei suana mara ni mak, tenchu Pathian pek ke, tuten ei anlianpui nokna rang.

¹⁰Pathian sika ke imo nei ni hi, Krista Isuana asa tho ranga ansina nei om, Pathianin atho ranga ei na lei sin pe.

¹¹Nangni Jentaila anzir “vun at lui” atia anpai ngai Judan ei pei ngai “vun a at” ngaiin (min taksana imo ei tho) machin imo nei ni u ha re u ro.

¹²Hava lai han Krista ata mitei na ni u. Khual na ni u, Pathianin ei athang ngai ni u mak che. Chongtina han anchel u mak che, Pathianin ami ngai rang ei mansuk achongtin sabei rui abuia hi ramuala nei om, Pathian abuia nei om.

¹³Ten atun nang Krista Isua ata ala na a om chachak ha, akola, Krista thisena ana hong tuang zei.

¹⁴Krista apum lenin phukdaina ahong koi Jentail le Juda, mi khata asina. Ama taksa le. Ha bang ha ama siat asen chachak ha hatuka ralduia asin ha.

¹⁵Juda Dan le chongpek le dan ama siata, chinni ata angkhata asin ranga ama le munkhata hintin hin anngoina sina.

¹⁶Krosa, ei thina le Kristan araldui nina ama siat; Krosa chinni ei malopa taksa munkhat asina Pathian tiang ei hong ruai ret.

¹⁷Hasik han Isua Krista ahonga mi dora kom thangahui anngoina ahong ril, nangni Jentail Pathian ata ala na ngai le nangni Juda ngai akola om ngai.

¹⁸Kristana ke na loma Juda le Jentail Ratha munkhata nei hong theina Pathian matona.

¹⁹Hasik han nangni Jentail ngai ram atei mi mo, khual mo ni ulai mak che; atun nangni hi Pathian mi ngai le munkhat hatuka Pathian insungko mi.

²⁰Nangnim lungphum zolai ngai le deari ngaiin ei sin le ansin na ni u, ha akila lung ha Isua Krista apum len ha ani.

²¹In asur ha ama hake hatuka munkhata biakin anthiang amanson Puma ranga andar.

²²Ama le nang um munkhata ansin na ni atei ngai dora le mun angkhata hava han Pathianin a Ratha le ei om.