Read Ranglong EPHESI 4 Bible Online

EPHESI 4 - Ranglong bible

EPHESI 4

¹Koi Puma dorbondom sika lungina a om han keina mathem u; Pathian ei na kui u anga a om ranga han.

²Ten umora annuaia, annem ro, diar ro. Anloppuia, na lungkhamna manmu ro.

³Nei tho thei dor pei athona munkhat changna en u ro phukdaina na Rathan ei na pek hava han munkhata ei na khit.

⁴Ratha angkhat le taksa angkhat ei om sabei rua angkhat ei omna Pathianin ei na pai anga.

⁵Puma angkhat, iamna angkhat, baptisma angkhat a om.

⁶Pathian angkhat hatuka Pa mi dora ranga, ama ha alompeia apuma aloma ei thona ama ha aloma ei omna.

⁷Na rang chipa nei man khat chu a om Krista changai ata nei man.

⁸Pathian chongin ei ti anga: “Chung ansangkhita ase lai han, Ansur ngai chu abila aruaia; Miring kom um pek rua apeka.”

⁹Atun, chu “chunga ase” itinamo? Mansana phila annuai khita ahong.

¹⁰Hasik han ahonga chumpu den ha chunga ase vanram sontiang varal ramual dora ama le ei bitna rang.

¹¹Ama keng “mi ngai pek rua apek,” asen a zolai ranga athang, atei deari ranga, asen thangahui aril rang, atei Pastor rang le minchu rang.

¹²Hiva ei tho hi Pathian mi ngai Pathian sin atho ranga ei sin Krista taksa asin ranga.

¹³Hasik han na loma angkhata nei hong rang nei iamna na hatuka Pathian Sapa nei riatna na; mipuiting nei hongni rang Krista dung ava phana.

¹⁴Hatuka naipang anga omlai no mani tiduarin ana choia, thinthin ana zuangpuia, mi huang ngaiin mi ei manchu anga, mi siatna tiang aruai u na ei thei u na le.

¹⁵Hantin ni luia chong dika achonga lungkham ratha le lampui tina Krista tiang nei anson rang, asik chu ama ha alu ani na.

¹⁶Ama maruaia na taksa dora munkhata ei kopna tak dora hi anzom le munkhat ei changa hava lehan ei anzon. Hasik han bak atatei ei tho rang athon ke na taksa ei anson hatuka hantin han atheia lungkhama ei ansin.

¹⁷Puma raminga keina rakok u; iam lui ngai anga om u lai no ro, ei mandon u ngai akorong,

¹⁸hatuka amalung u azing kara. Pathianin damna ei peka anchel u mak amo u la re u lui.

¹⁹Anzakna don thak u mak hurna na anpek u na hatuka asanok dora tel thak luia ei tho u.

²⁰Hava ha ni mak Krista rui nei anchu!

²¹Arui na riat nget zei, azi ngai anga dik, Isua koma a om nan chu zei.

²²Hasik han na om marua u ata ankhai u ro machina nei om u anga anan om u ha, om marua ana huang zot anan siat u ha.

²³Na malung u le nei mandon u ei thar nget rang anang,

²⁴hatuka om athar le anliang u ro, Pathian aphua zeka ansin ha hatuka atheia ahong anlang damna dika asa le anthianga.

²⁵Hasik han milak om lai mak! Na lom u na chongtak nei ril u rang a iam atei ngai kom, asik chu na loma Kristana munkhat ke na ni.

²⁶Na takasi nam pap na mantho no rase. Hatuka sun sot na taksi no rase.

²⁷Diabol her pe no ro.

²⁸Anru chachak na niten anru lai no tan sin tho ro lalchi ruaia adama anriang ngai nei san theina rang.

²⁹Chong ana mang no ro, amang rua chong mang ro, anasin thei, anang anazon thei, anariat ngai ei sapuina ranga.

³⁰Pathian, Ratha Anthiang man nuar no ro; asik chu Ratha hi Pathian apuma ei nina andangna nang na kom, nikhat la hong inti havatika Pathianin na la mazok inti.

³¹Akhana, taksa zotna, taksitna ata ankhai ro. Ankhek, siat aril om lai no rase, anmumakna le asiat om lai no rase.

³²Hanekten, andita lungkham anmu na andual ansiata om u ro, Pathianin Kristana ei na madual u anga.