Read Ranglong EPHESI 5 Bible Online

EPHESI 5 - Ranglong bible

EPHESI 5

¹Pathian nai madit nei ni u sika ama anga anina tho nget u ro.

²Nei damna lungkhamin sur rase, Kristan ei na dita koini rang ei thi marim ahui dali andar anga Pathian malung ei zot anga ni u ro.

³Pathian nai ngai nei ni u sika hurna, asanok rui, huatanham rui, aril na kar u na om u no ro.

⁴Anzakna rui, chong korong, bizela hava ngai ha anhui mak. Hanekten Pathian kom raisanna ril u ro.

⁵Re sadim u ro, andit, annim, huatanham, (huatanham hi ramil abiak khat ani) hiva ngaiin ite chang u no ni Krista le Pathian reng changna na.

⁶Chong korong le tuten na huang u no rase; hiva ngai sika Pathian taksitna hong inti atel nok ngai kom.

⁷Hi ang mi ngai le chu ite tho u no ro.

⁸Machin chu nangni ha azing kara om na ni u na, ten atun chu Pathian mi na ni u na ra-anga om ke na ni u zei, hasik han ra-ang mi ngai anga om u ro.

⁹Asik chu Ratha mara ngai chu satna dora dikna dora le chongtak dora ei hong anlang ani na.

¹⁰Pathian malung do anchu ro.

¹¹Min akorong ei tho ngai anga ite tho u no ro azing kara ngai anga. Hanekten ra-anga hong masuak u ro.

¹²Maruka ei tho u ngai hi aril ngal anzakna om.

¹³Ra-anga ahong anlang kiar suale chu a nundan u tatak anlang;

¹⁴asadima anlang tak chu ra-ang ke ei chang, hasik han ei anti: “A in ngai anthui u ro, hatuka athi ata anding ro. Kristan na chunga el inti.”

¹⁵Hasik han anreng ro hontinmo nei om. A mo ngai anga om no tan, ahian ngai anga om ro.

¹⁶Her nei man dora adika mang ro asik chu nikhua ngai hi samak.

¹⁷Mo no tan la Puman imo nei tho rang ei na zot enro.

¹⁸Zu anri no ro, hava han na masiat inti hanekten Ratha lehan bit ro.

¹⁹La le la anthiang le chong u ro; la tho u tan Puma na malunga manpak u ro.

²⁰Koini na Puma Isua Krista raminga alompeia sika Pa Pathian kom raisanna mantung u ro.

²¹Krista lalchi nei tho sika anbetok ansiat u ro.

²²Nupang ngai Puma kom nei anbetok anga na ruathar kom um anbetok u ro.

²³Asik chu a ruatharin a nungak chunga ningneina a don. Kristan kuibing ngai chunga ei nei anga hatuka Krista len ha kuibing sandampu, ha a taksa.

²⁴Hasik han nupang ngai na ruathar kom nei anbetok rang kuibingin Krista kom ei anbetok anga.

²⁵Pasal ngai na nungak adit u ro, Kristan kuibing ngai ei adita ei damna ei pek anga.

²⁶Hiva ei tho hi kuibing Pathian kom adar ranga a chong le tina arasuka a manthiang suale.

²⁷Ei sana dora le kuibing ngai akom ei anpek theina rang anthiang le masial abuia, manu abuia, apop abuia hanuk atei ei dik nokna buia.

²⁸Pasalin ataksa ei madit anga a nungak um madit rase. A nungak andit chu amam andit.

²⁹Tuten ataksa anmumak om mak. Nei zon, nei rung, Kristan a kuibing ngai rang ei tho anga.

³⁰Koini hi a taksa bila keng na ni.

³¹Pathian chongin ei ti anga, “Hiva sik hin pasalin a nu le a pa mantia a nungak le munruala om untia, hatuka ha anni ha angkhat chang unti.”

³²Hiva hin rilmaruk adik a om hiva Pathian chongin ei manlang hin, koi kei riat anga chu Krista le kuibing ha aderdin.

³³Tenchu nang um ana derdin; a ruatharin a nungak ei adit rang ama ei andit anga, hatuka nupangin a ruathar lalchi ei tho rang.