Read Ranglong EPHESI 6 Bible Online

EPHESI 6 - Ranglong bible

EPHESI 6

¹Nai ngai, nupa he tel hi na Kristian nina na nei tho rua, hiva hi atho rua dik.

²“Na nu le na pa lalchi tho ro” hiva chongpek mansa hava bila chongtin anlop:

³“Hankeng aloma ei sa theina ranga, hatuka ramuala adam nei sot theina rang.”

⁴Nupa ngai, na nai ngai sinsaka atak mansi u no ro. Hanekten Kristian anchuna le ansonna tho ro.

⁵Suak ngai, na miringpui na puma ahe tel ro anchi le anringa; hatuka malung apeka tho ro, Krista rang nei tho anga.

⁶Ana en lai rong ni luia asa nei anlona ranga; ten na malung dora le Pathian ei zot anga tho ro, Krista suak anga.

⁷Na sin tho suak anga raisana tho ro, miring duai ni luia Puma nei tho pe anga.

⁸Re u ro, Puman ratpakna pek inti, suak, suak nok sin asa nei tho sika.

⁹Apuma ngai, amun banga na suak ompui ro maphut chachak lai no ro. Nang le na suak ha Puma munkhat keng nei don u anvana. Mi dora munkhata rui aril.

¹⁰Eihekna na, Puma na ranak nei u ro ama thotheina le.

¹¹Pathianin ral raliang ei na pek dora le anliang u ro, hankeng Diabol a zia siat nei dui thei u rang.

¹²Asik chu koini nei anduipui hi taksa thisen ni mak tenchu anlalna don ngai le maniapur azing kara reng ngai le chungvan tianga raluai ngai le andui ke na ni.

¹³Hasik han atun hin Pathian ral raliang le anliang u ro! Hatuka nikhua sia hongtik na raldui lei dui thei na ti, hatuka ahek tenpei nan duipui suanam landing tit na ti.

¹⁴Hasik han ansina anding u ro, na konga dikna kongkhit le akhita satna roppho na ropa,

¹⁵na kena kekok le ansina phukdaina thangahui aril ranga.

¹⁶Umora iamna, pho anga sur u ro; hiva ngai lehin thal achuang Diabolin ei hong kap heng thei na ti.

¹⁷Hatuka sandamna ha lukhu anga pom u ro, hanuk Pathian chong khendai anga mang u ro Rathan ei na pek ha.

¹⁸Hiva ngai dora hi bor azong chunga tho u ro Pathian kom sanna azonga, zoro tina borzong u ro, Rathan ei na maruai anga. Hiva sik hin meng u ro mathan u no ro; Pathian mi ngai rang borzong u ro.

¹⁹Hatuka ka rang um borzong u ro, Pathian chong ka ril rang le Pathianin chong ei na peka a angama chong kei ril theina rang le thangahui anthup kei manriat theina rang.

²⁰Koi hi hiva thangahui sika palai, atun lungina a om ka ni nam. Bor na zong pe u ro, angama thangahui hi kei ril rang ang taka kei ril theina rang.

²¹Tukhik koini na parual madit suak aiamrua Puma sin a thona, ama han koi ka rui aloma na pe unti, hava han re u na ti hontinmo kei om.

²²Hasik han ama nangni na kom kei hong tir hontinmo nei om aril rang le nangni ananthor ranga.

²³Pa Pathian le Puma Isua Kristan Kristian phukdaina dora le lungkham le iamna chu unai ngai koma om chian rase.

²⁴Pathian lungkhamna chu Puma Isua Krista andit ngai kom thithei lui lungkham om rase.