Read Ranglong PHILIPI 1 Bible Online

PHILIPI 1 - Ranglong bible

PHILIPI 1

¹Krista Isua asuak Paul le Timothi koma, Philipina Pathian mi ngai Isua le munkhata om ngai kuibing ulian le asan ngai rang.

²Koini na Pa na Pathian le Puma Isua Kristan lungkhamna le phukdaina na pe u rase.

³Ka na mandon u kip Pathian kom raisanna ka ril;

⁴nangni na rang bor ka zong le raisana ka zong chachak,

⁵asik chu thangahui sina aphut ata atun tenpei nei na san u.

⁶Hasik han ka iam nget, Pathian nangni koma sin asa phut han ruai zel inti ansua maseng Krista Isua nikhua ten.

⁷Ka malunga na om chian u! Hava ha ka rang adik nangni ngai rui achui hi. Asik chu Pathianin hun asa ei na pek ha lokon nei na mang pui, atun lungina ka om lai um hatuka machin ka zok lai han thangahui ranga ka duia anding ka ngam lai han.

⁸Pathian hi ana riat ani adik kei ril ka malung rila nei chui u hi Isua Krista apum len amalung ata keng.

⁹Na lungkham ei anson riam u na rang bor ka zong ariat sadima hatuka ruirilna adik taka nei thothei u na rang.

¹⁰Asa khit nei athang u theina rang! Hankeng akhel ata nei zok u rang hatuka Krista nikhua bado ata nei zok u rang.

¹¹Nei damna asa dik le nei bit u rang hava ha Isua rong ke ansua thei, Pathian ei anlianna rang le ei anpakna rang.

¹²Ka lom ngai nei riat u rang ka zot kei tong ngai han thangahui ansonna rang ana san tatak!

¹³Ei mazir chu, reng in arung ngai dora le hivana mi atei ngai doran lungina kei om ariat u asik chu Krista suak kei ni sika.

¹⁴Hatuka lungina kei om hin aiam ngai Pumana lungngamna mansa u, ngamna le anson chian u na Pathian chong achi thak luia aril ranga.

¹⁵Ani hosenkhat mo chu khamaret le mi le ankhal zot tuara Krista rui aril, ten atei senkhat chu anthianga ei zotna sika.

¹⁶Amani chu lungkham sika ke, asik chu ariat u Pathianin thangahui arung ranga ha sin ei na pek.

¹⁷Senkhatin malung apeka Isua rui ril mak, tenchu ratha sungathu derdin le; lungina ka om lai hin manpon sa inti atina amandon u.

¹⁸Ten ite ni mak! Hava sika ka rai asan Krista rui anrilna lampui ani thei kar chu, mandon anthiang mo, akhela mo ka raisan bang inti,

¹⁹asik chu ka riat na borzong u na zara le anasan Isua Krista koma Ratha ahongin na mazok inti.

²⁰Ka rila kei zot le kei sabei chu ka sintho machai no rong ti hi. Ten umora le atun tak hin ngam sabak ka ti ka nina dora le Krista lalchi makhai ka ti, ka thi mo ka dam mo.

²¹Damna hi irang mo? Ka ranga chu Krista, ka thi le mansa ka ti.

²²Tenchu taksana adam chian rang ka niten, kei pongna mara nei sabak inti. Ten hovamo, athang ning? Re makung.

²³Chang annina ana nuk. Krista le ava om ranga ka zot hiva adam amaka hava ha asakhit ei ni.

²⁴Ten nangni na sika kei dam hi asa ual.

²⁵Kan iam asadima hiva ruia hin, hasik han kan riat la om ka ti. Na bil u na la om bang ka ti, nei anson u asap ranga hatuka nei iam u na hin na rai ei san u na rang.

²⁶Na bil u na kei hong om reta hin ka sika Krista Isuana na raisanna ei liam thei u na rang.

²⁷Ariatrua khit chu na omdan u le Isua thangahui antuk rase, ka hong hongmak adeta andinga malung munkhat achoia thangahui sika anruala iamna le nei dui u kei riat rang.

²⁸Na raldui ngai achi u no ro, ngam babang u ro, hava han ei andok u rang manlang inti hatika nangni chu rat u na ti asik chu Pathian ke ratna ana pek u.

²⁹Nangni chu Isua rang sinthona her ei na pek u, aiam duaia ni maka ten ama ranga atiar tiangam ei na pek.

³⁰Atun chu nangnim ka bila hi anduina na nan chel thei u. Hava mana anduina na nei na mu u den hake kei la dui chian atun tenpei.