Read Ranglong PHILIPI 2 Bible Online

PHILIPI 2 - Ranglong bible

PHILIPI 2

¹Kristana nei dam hake ranak ana pek, hatuka a lungkhamin huina ana pek. Ratha le munruala anlopa, hatuka lungkham nei anmu u nei andit u.

²Keina mathem u ani zei, ka raisanna anan khip pe ranga, malung munkhata hatuka ratha le mandon munkhata.

³Derdin asiat ata tho u ta ni, hatuka zotna anthuk lui anlianna rang tenchu annuai u ro, ka nek ten mi asa ti babang u ro.

⁴Nei lokna rang anen ansiat u ro, na theia rang rong ni mak.

⁵Na malung vong Krista Isua anga ni rase:

⁶Pathian ang dor ei ni, tenchu Pathian anga a om tit rang ti mak therkhaka.

⁷Hanek ten ama ei zotna le ei nei dora amaka suak nina ei athang. Miring ei hong ni miring anga ei hong anzir.

⁸Ei annuaia hetel lampuia kal achoia thina lampui ei thina kros tenpei.

⁹Hiva sik hin Pathianin ansangkhita adom hatuka raming atei ranga alian khita raming apek.

¹⁰Hasik han Isua raming lalchi thona mi dora vanrama, phila, ramual thuaia miring a mankhuk ei la bil rang.

¹¹Hatuka malei tinin Isua Krista hi Puma ei la ti rang Pa Pathian lianna ata.

¹²Hasik han ka lom madit ngai na bil u na ka om laia ka he nei tel u anga, na bil u ata kei ankhaia hin ka hetel ual sa u ro. Anchi le anring chunga na sintho tit u ro, na sandamna ei ansua theina rang.

¹³Asik chu Pathian na tak chunga sin atho chian keng ei na manzot hatuka thotheina ei na pek ei zot nei tel theina rang.

¹⁴Nei tho rina siat ril luia, ankhal luia tho u ro.

¹⁵Asik chu masial nei lui Pathian nai ansua anga nei ni thei u na rang, hi ramual asiat le pap bila nei leng u na hin, nangni chu amani kara a el rang na ni u, arasin anvan ei el anga,

¹⁶damna chongbe na ril lai hin, nei ril anga na om u ten nangni na sika kei anlianna asik om inti, Krista nikhua tika, asik chu ka sintho dora le kei pongna akorong chang mak.

¹⁷Pathian koma iamna, nei anbol u le sinthona ranga aluang zita ti anga andar rang ka ni nam ka rai asan hatuka ka raisanna ana sem u rang ka zot.

¹⁸Havantin anga han nangnim na rai ei san u rang hatuka na raisan u na nei na sem u rang.

¹⁹Pathian ei zot aniten, ka iam Timothi hong manhong thei ka ti anrapa nangni kom, nangni rui ariata ka ak ei thui theina rang.

²⁰Ama rong hike ka salung ariat, hatuka ana tel sabak.

²¹Atei dora chu arang rong ke ei mandon u, Krista sika ni mak.

²²Nang lenin ei sat zia na riata hontinmo ama le koi naipasal le pa anga thangahui sika sin nei tho.

²³Hasik han anrapa ahonga tir thei ranga kan iam asik chu hontinmo ka rang imo honga tung rang kan riat.

²⁴Hatuka Pumana iamna ka nei ka pum len nangni kom ahong lilip ranga.

²⁵Koini na parual Epaphrodita hi nangni na koma anhong anang ti ka mandon, ka bila sin athona ana duipui, nangni na palai anga sina ana san.

²⁶Ana mu u ranga achan a zot hatuka ana atina nei lei riat u ha achan atichang re mak.

²⁷Ani chu ei ni, a nana athi vit. Tenchu Pathianin lungkham amuna, ten ama rong ni maka kom ana mu ka malung ei na rang ana reng.

²⁸Koi ke azot ual ahonga tir ranga ama na mu u le na rai ei san ret thei u na rang hatuka ka malung nana ei anpeina rang.

²⁹Raisana lei pham u ro, Pumana aiam ngai anga. Ama ang miring dora lalchi tho u ro,

³⁰asik chu aporan anchan ngal angama athi vit Krista sin sika, koi ana san ranga nangnin chu nei tho thei u nok.