Read Ranglong PHILIPI 3 Bible Online

PHILIPI 3 - Ranglong bible

PHILIPI 3

¹Eihekna na, ka lom ngai Puma le munkhat nei ni na hin na rai mansan u ro. Kei maziak sua anziak ret ranga asiat ti making, zok riam u na ti ka tho ten.

²Asia tho ngai kom ata anreng u ro, ui ata anreng u ro, taksa azot le aninga anvit ngai ata anreng u ro.

³Koini ke, amani ni mak vun a at tatak chu Ratha le Pathian neia mok, Krista Isua le munruala nei damna hi na rai nei mansan tualpang riti na anbetok mak me.

⁴Zot ila chu koi um taksa chunga anbetok thei kei ni ke do. Min taksa chunga ei iamna abetok thei ten koi ual ke athei rang.

⁵Hapta khat ka ni le vun kan ata. Kei anzir anga chu Israel mi ka ni Benjamin achi ata Hebrai thisen dik tak. Juda Dan azi ruia chu Pharisi ka ni.

⁶Hatuka khamaret sika kuibing ngai kei sinsak min ituktenmo Dan azina atel thei hador kei ni, masial reng don makung.

⁷Tenchu hadora ha kan lok kei ti ngai ha, ten atun chu ka riat zei Krista sika anpeina ke.

⁸Hava ngai rong ni mak; alompeia alu Krista Isua anchanna kiara ka riat. Ama sika alompeia ka pei kiar zei; anpei ruana ka riat; Kristana kei anlokna rang,

⁹hatuka ama le munkhata kei om theina rang ka theia chu dikna ngal don makung Dan azina kei lok theina; atun chu Krista iama ke dikna kei man, ha dikna Pathian ata hong ha iamna na ke.

¹⁰Aloma kei zot khit chu Krista ariat; hatuka ei anthuina ranak rui ariat, aduk atiar pui, ei thina na ama anga ani pui.

¹¹Ka sabeina na koi um ni rase athi ata adama kei anthuina rang.

¹²Koi hi ka zuia kan sua zei anti ni making. Ansepa kei om ratpak kei manna rang Kristan ama ei na zuina ha, ama rang.

¹³Tenchu ka lom ngai, aman anga chu aniam making; ha kei tho khat chu, ka nuka anngila kei tho thei dorpei athona ka matona ava pha.

¹⁴Hasik han andin phita kei tan ha derdin tiang ha ratpak kei manna rang, Krista Isuana Pathianin chung tiang ei na kuina.

¹⁵Na loma rathana puiating ngai chu hia ang malung vong nei don rang. Tenchu malung vong atei adon na om u ten hava ham Pathianin na la manthiang pe unti.

¹⁶Ei ni ang ni rase maton tiang pan tit u rei atun tenpeia a riti nei zi anga.

¹⁷Koi nan chu u na ro, ka lom ngai. Nangni ranga en rua nei tho ngai thir u ro.

¹⁸Ka na ril babang u zei hiva rui hi, atun achap chunga kei na ril ret u, mi tampa om a omdanin Isua Krista Kros a ei thina ralduia asin u.

¹⁹Hava ngai ha moisumpuia hek unti, asik chu a taksan ei zot u hake a Pathian u. Anzakpui chi hake ei lianpui u, hatuka ramual rui rong ke ei mandon u.

²⁰Hanum nisela koini chu vanram khomi ke na ni, na sandampu Puma Isua Krista vanram ata ei hong nei maruang.

²¹Aman koini na tak ranak abui athi thei la thul intia ama anga anlianna taksana la sin inti, thotheina manga hava le ama riti thuaia hong koi kiar inti.