Read Ranglong PHILIPI 4 Bible Online

PHILIPI 4 - Ranglong bible

PHILIPI 4

¹Hasik han ka lom ngai, ka ranga itukmo andit rua nei ni u, achan ka na rangai u! Ka rai itukmo nei man san u, itukmo keina lianpui u! Hivantin hin ka lom ngai ani, na damsung Pumana adet tita ngirsai nei anding u rang.

²Euodi le Suntuki, lungkham taka keina mathem u ni zei Pumana zuarpui anga anpom u ro.

³Hatuka nang um, ka lom iamrua, hia nupang ngai hi san ro; ka bila achan apong u thangahui ei anthekna rang, Klement, hatuka atei ka sinthopui ngai Pathian koma damna lekhana a raming u akal ngai.

⁴Pumana na rai mansan u ro, kei ti ret ani zei na rai mansan u ro!

⁵Annuai malung vong man mu u ro, mi dora tak chunga. Puma ahong rang ani zei.

⁶Ite andon u no ro, tenchu bor na zong u le nei nang Pathian kom zong u ro raisanna malung le zong u chachak ro.

⁷Hatuka Pathian koma phukdaina miring riatphasam varal han na malung, na mandon, na rung pe unti Krista Isuana anruala.

⁸Ahekkhita ka lom ngai, na malung asa le manbit u ro, anpakrua le adik le, ansang le, atak le, anthiang le, asa le lalchi.

⁹Ka koma nei anchu u le nei man u ngai ha anchu chian u ro, ka chong ata le ka om ata. Hatuka phukdaina anapek Pathian ha na bil u na om inti.

¹⁰Ka dam sung ni Puma le kei anlopa hin ka rang raisanna lian tak ani, hava suale asotpa suana nei na poisak u na her nei man ret u. Nei na poisak u nok kei tina ni mak tenchu her nei man u nok sik ke.

¹¹Hatuka min ei na poisak noka kei anriat tinam ni mak, ten kei nei tuk le lung nuamna chang ka thei zei.

¹²Abuia om hi ka riat, nei nang neka don him ka riat. Hava chong maruk ha ka riat zei, hasik han kei omna tak peia ka ngir, ka khop mo, kan cham mo, kei don lup mo, alakte mo.

¹³Hava tak ha adiar theina ranga ranak Kristan ei na pek lehan ka diar thei.

¹⁴Tenchu kei antakna na nei na san u ha achan asa.

¹⁵Nangni Philipi ngaiin asadima na riat u Makedonia ka mak lai han hava man thangahui aril ata na kuibing u rong hi ani ana san; kei tham kei anlok nangni rong hi na ni u anan sempui.

¹⁶Voikhat nek atam Thesalonikana asan ka nang lai han, ka kom na hong mathuan u.

¹⁷Pekna kei man duai ha ni mak, haneka nangni na raminga nei anlok u ansap um ka mu zot.

¹⁸Hile aloma nei na pek u ngai dora a lekha, anang neka ahun! Kei nang dora ka nei, atun Epaphroditan nei na pek u ngai dora ahong choi. Hava ngai ha Pathian matona marim ahui adar apom rua le apham rua anbolna dali ei chang ani na.

¹⁹Hatuka neinun atampa aman Krista Isua zara, ka Pathianin nei nang u dora na zon unti.

²⁰Koini na Pathian le na Pa kom anlianna umor taituana om rase! Amen.

²¹Pathian mi ngai Krista Isua ata ngai kut ka nan surpui u na sang chip u na. Hivana ka bila aiam ngaiin kut anan surpui u.

²²Hivana Pathian mi ngai doran kut anan surpui u, aliaktena Kaisar ina mi ngaiin kut anan surpui u.

²³Puma Isua Krista lungkham na bil u na om rase.