Read Ranglong KOLOSSA 2 Bible Online

KOLOSSA 2 - Ranglong bible

KOLOSSA 2

¹Na manthei u ka ti ituk antak mo nangni rang le mi ngai rang Laodekiana sin kei tho hanuk atei ngai rang ka binga koi na re lui ngai rang.

²Hiva kei tho hi ngamna le ei bit u na rang le lungkhamna le ei anlop u theina ranga riatna dikin angamna nei don theina. Hintin hin Pathiana chong maruk ha ei riat thei u rang hava ha Isua apum len hake.

³Ama hi ke chabi maruk donglua Pathian hianna le theina anlong thei.

⁴Keina ril u ni zei min ankhalna dik lui le na huang u no rase, ituk ngal mo asa ngal ni u rase.

⁵Taksana na bil u na ka om nokam rathana ka na om pui u, adet tita a om rang nei val u ha Krista aiam hava ngai ka muna ka rai asan.

⁶Isua Krista Pumana nei pom u ei ni sika ama le anlopa om u ro.

⁷Na razung ama tak chunga anthuka om rase, ama tak chunga nei damna sin ro, hatuka nei iamna ha mandet riam ro, nei anchu u anga han. Hatuka raisanna pek changa bit ro.

⁸En ro, hatuka, ramual hianna le na huang u ni, hava ngai ha miringin ei hong choi le rathan ramual ei vongna, Krista ni lui ta.

⁹Amana han Pathian nina dora akipa taksana ei om.

¹⁰Amana han ansuavang anpeka nei om. Ama hi aloma thotheina le chongneina alu.

¹¹Krista le vun a at nei ni, miring vun ata ni mak tenchu Kristan vun atna ei sin le hava ha naninga asia ata zok theina.

¹²Asik chu baptisma nei lak han Krista le nei anphum hatuka baptisma na han nang um Krista le nei anthui nei iamna na Pathian thotheina le athi ata anthui han.

¹³Voikhat chu rathana athi nei ni nei se sika hanuk Jentail nei ni Dan nei bui. Tenchu Pathianin Isua zara damnana ana hong ruai asia dora Pathianin ana madual.

¹⁴Aman nei antang ngai ha ama siata ama riti le hatuka aman ataka Krosa atara.

¹⁵Hatuka ha Krosa han Kristan atheia ei anzok ratha ranak le thotheina ata, mi mutheia ei sin Krosa ei zuina na.

¹⁶Hasik han tuten riti sin no rase nei nek, nei sak rui nikhua anthiang rui Tha Thar Panta mo Sabat ruia mo.

¹⁷Hiva ngai hi nangkana ralim mai ke; Krista hike atak.

¹⁸Hasik han tuten anthuaia na mu u no rase, alian anti ngaiin, anralna amu ngaiin, annuaina diklui ngaiin hatuka vanpalai anmok hava ngai ha asik ngal om mak, hava mi ngai dora miring mandon papeiin ei tho ke.

¹⁹Krista ei sur u amaka na taksa puma ha, Krista ruaia na tak pumpui ei khop hatuka lokona anlopa ei anson Pathianin anson rase ei ti anga.

²⁰Krista bila na thina hatuka ramual dora aruai ratha ata na zoka. Hanle ichangmo ramual ta anga nei om? Ichangamo hiva riti ngai nei la pom u,

²¹“Hiva ton u no ro,” “Hava sa u no ro,” “Atei ngai ton u no ro.”?

²²Hiva ngai dora hi voikhat anmang tenchu amangna abui miring riti le miring manchu mai ke.

²³Tenchu ani hiva ngai hi hianna ata hong vanpalai anmok therkhaka, taksa ansinsak, tenchu hava ngai ha taksa ningolna antor theina rang khop chu ite alamluana abui.