Read Ranglong KOLOSSA 4 Bible Online

KOLOSSA 4 - Ranglong bible

KOLOSSA 4

¹Puma ngai, na suak u ngai tak chunga nei tho dan anthiang rase dik rase. Nang um vanrama Puma don ke na ni atia anre ro.

²Borzong chian u ro, bor na zong u le hian vang u ro, Pathian kom raisanna aril chunga.

³Hava bibila koini rang um borzong u ro. Pathianin koini her asa tak ei na peka achong nei ril theina ranga Krista chong maruk ha. Hava sika han atun koi lungina kei om.

⁴Kei ril rang anga kei ril theina rang borzong u ro, anthiang vanga kei ril theina rang.

⁵Na singansa u ahian vanga ni rase aiam nok ngai kara, her nei don u ruia asadima mang u ro.

⁶Umora na chong ril u ahuia anngai rua ni rase, hatuka adik pika mi dora ansang dan thei u ro.

⁷Koini na lom madit Tukhika aiamrua, sin atho le Puma sin athona na lom suak, aman koi ka rui dora na pe unti.

⁸Hasik han ama hi nangni kom kei hong tir, na ak ei thui u na rang hivan na loma hontinmo nei om.

⁹Ama bila Onesima um ase na lom madit aiamrua na bil u na mi. Amanin aloma na ril kiar unti hivana rui ngai.

¹⁰Aristarka, ka bila lungina ankhum Mark, Barnaba asapan chibai ana hong tho u, (Mark nei lei pham u rang hi chu na riat u zeia) nangni tiang a hongten.

¹¹Isua, ha Justa anti ha amam kut anan surpui u. Hiva anthum ngai rong hike Juda na aiam ngai Pathian rama rang ka bila sin atho ngai amani hi achan ana san u.

¹²Hatuka Epaphra akomam ni rase kut ei nan surpui u na aman tung, na lom u khat ret Krista Isua asuak. Achan nangni rang bor azong, nei deta nei anding tit thei u na rang, le Kristian puiating le Kristian rui ariat, Pathian malungdo anga atel.

¹³Koi ka pumin asin tho rui ka ril ngam nangni rang le Laodekei ngai rang hatuka Hierapoli ngai rang.

¹⁴Luk koini daktor madit le Dema han kut anan surpui u.

¹⁵Laodekeia na kuibing ngai kut nei ansurpui na mantung u ro hatuka Mippha le kuibing ama ina anchun ngai.

¹⁶Hiva lekha na en sua u le Laodikei kuibinga ei anpore theina ranga en u ro. Hatuka Laodikei kuibing ngai koma lekha ham en u ro.

¹⁷Hatuka Arkipa ha ril ro. “Asin anpeka Puma sin ha sua nget rase.”

¹⁸Hiva hi koi ka kut le kei maziak. Paul akom ata anmokna, ka kuta zingzir mangil u no ro. Pathian lungkhamna na bil u na om rase.