Read Ranglong 1 THESALONIKA 4 Bible Online

1 THESALONIKA 4 - Ranglong bible

1 THESALONIKA 4

¹Hantin han o unai ngai, ahek khitna na, koinin Puma Isuana nei na mathema chun ngo nei na ril ani zei, hontin nei lenga mo Pathian rai nei mansan rang. Hava ruia koini koma nei anchu u ha hatuka hontinmo nei leng ang hi hava neka anphul rase.

²Asik chu Puma Isua lehan koinin nangni ranga hong chong mo nei na pek ha hava na riat u.

³Pathianin ei zot khit chu hiva hi nangni nei anthiang hi.

⁴Nangnin uire ata nei ankhaia nangni na sang chipa,

⁵Pathian re lui ngai, ha Jentail ngai anga ahur ningola ni mak tenchu anthiang le lalchi thona.

⁶Tuten rikung ankana hava ruia a parual huang no rase, asik chu koinin man ata nei na ril le nei na manriat, hava anga Puma ha hava ngai dora athuanpu.

⁷Asik chu Pathianin koini hi annim rang ni maka tenchu anthiang ranga ei na pai keng.

⁸Hava rang ana tel nok tak chu aman mi ha ei tel nok ni maka, Pathian hake ei tel nok. A Ratha Anthiang nangni ana pek u ha.

⁹Hatuka a parual andit ruia chu anziak nang u mak che asik chu nangnin, nangni le nangni andita nei om u ranga Pathian kom ata anchuna na man u.

¹⁰Hatuka taktaka Makedonia pumpui a a om unai ngai dora ranga hava ha nei tho u.

¹¹Tenchu anthema kei na ti u ni zei unai ngai, ha neka atama anphula om u ro, hatuka adai riama om ranga le na sin chip u a tho ranga hanuk naninga na kut le a pong ranga taksat u ro, koinin nei na ti anga han.

¹²Pang tianga mi ngai chunga annuaia om u ro, ite ansam no rase.

¹³Tenchu o unai ngai, koinin a in ngai ha, amani ruia nei riat u nok ranga zot mak me. Sabeina nei lui mi tei ngai anga na malung nei manna u nokna rang.

¹⁴Asik chu Isua hi athi, hanuk anthui ret, koinin nei iam tak ten, hava han na riat Pathianin Isua lehan a in ngai um hantin han ama bila hong tuang inti.

¹⁵Asik chu koinin Puma chong lehan nangni ha hava ha nei na ril, koini adama la om ngai hi Puma hong tenpeia alan nianga a om koinin a in sua ngai ha khel thak no ma ni.

¹⁶Asik chu Puma nget han raisanna rasa le vanpalai ulian khit ahe le hanuk Pathian totorot rahu le anvan ata chuma hong inti, hatuka Kristana athi ngai ha amani ha anthui mansa unti.

¹⁷Hatuka koini ala dam ngai hi ha alan niang ngai koinin anvana Puma le antong ranga munkhata ama le ansum bila na lan ti, hatuka hantin han Puma kom om chian inti.

¹⁸Hantin han nangnin hiva chong arila nangni le nangni phuk andai ansiat u ro.