Read Ranglong 1 THESALONIKA 5 Bible Online

1 THESALONIKA 5 - Ranglong bible

1 THESALONIKA 5

¹Tenchu unai ngai ahun tak le nikhua rui ngai chu anziak nang u mak che.

²Asik chu ramual om chang na riat u zana hontinmo anru ei hong, hantin den Puma nikhua a hong rang ani zei.

³Min, “Phukdaina le adamna a om zei,” ati lai tak hatik han amani kom naiha anga a honga ni tik, hantin han anlaiseka siatna hong tung rak inti, hatuka amanin pial thak thei u lai no ni.

⁴Tenchu, unai ngai, azing kara om ni u mak che, hatik han anru anga na chung u na hong tung inti.

⁵Nangni hi ra-ang nai le khua vara nai na ni u, koini hi zana mim ni mak me azing kara mim ni mak me.

⁶Hantin aniten, hong u ro atei mi ngai anga in u no rei; hanek ten meng u rei har u rei.

⁷Asik chu a in ngai chu zana ke ei in; zu nek ngai zana ke ei anri u.

⁸Tenchu koini hi sun ta ke na ni atia har vang u rei; iama le anditna roppho dunga, hanuk azokna sabeina lukhu a khu u rei.

⁹Asik chu Pathianin takasi ranga ei na phun ni mak tenchu koini na Puma Isua Krista lehan zokna manna rang.

¹⁰Aman koini sika ei thina ha na mengam, na inam, ama bila nei damna rang.

¹¹Hontinmo nei tho u ha, hantin den nangni le nangni lungngam ansak u ro. Hanuk mi tei le mi tei ansan ansiat u ro.

¹²Tenchu, o unai ngai, koinin nei na mathem ani zei na bil u na apong ngai ha Puman na chung u na ei phun, hanuk chunngo ana tho u ngai ha mandang rap u ro.

¹³Hatuka asin tho u sika hangai ha achalaka adita lalchi tho u ro.

¹⁴Nangni hi munkhat chang u ro hatuka unai ngai, koinin nei na mathem ani zei; dik luia om atho ngai ha, hangai ha, chun ngo tho u ro, ngamna tom ngai ngamna pe u ro, ranak abui ngai san u ro, mitin ranga adiar thei ni u ro.

¹⁵En ro, anan siat ngai thuanna ranga tute masiat u no ro, tenchu nangni le nangni hanuk mi dora chunga om asa tho babanga zi u ro.

¹⁶Raimansan chian u tan,

¹⁷Mong luia borzonga om u ro.

¹⁸Alompeia han raisanna ril u ro asik chu Krista Isuana hava ha nangni ranga Pathian ei zot.

¹⁹Ratha Anthiang chu manthi u no ro.

²⁰Chong aril ngai sumdem tho u no ro.

²¹Alompeia mansin kiar u tan, asa tak ha sur u ro.

²²Asiat rui tin ata ankhai u ro.

²³Hatuka phukdaina Pathian nget han nangni ngai ha aloma na manthiang u rase. Hanuk na ratha u le na malung u le na taksa u chu koini na Puma Isua Krista a hong tik le dem kai luia ansiak rase.

²⁴Ha ana kui u ha ama ha aiamrua keng aman hava ha tho inti.

²⁵Unai ngai, koini rang borzong u ro.

²⁶Unai ngai dora ha biang tum anthianga phamna chong ril u ro.

²⁷Puma raming le keina mathem ani u zei, hiva lekha hi unai ngai dora koma anpore rase.

²⁸Koini na Puma Isua Krista lungkhamna na bil u na om rase.