Read Ranglong 2 THESALONIKA 1 Bible Online

2 THESALONIKA 1 - Ranglong bible

2 THESALONIKA 1

¹Paul, Sila le Timothin Koini na Pa Pathian le Puma Isua Kristana om Thesalonikana kuibing rang.

²Koini na Pa Pathian le Puma Isua Krista ata lungkhamna le phukdaina nangni chunga om rase.

³O unai ngai, nangni ranga Pathian, ha raisan chong aril babang nei nang. Hatuka hava atho ha adik asik chu nei iam u na achan anson zei, hanuk nangni le nangni na chung u chipa lungkhamna anphul zei.

⁴Hasik han nangnin tiarna le antakna ngai dora ha nei diar u. Hava ngai dora han nei doroi u le iamna na nei om u sika, koinin nangni hi Pathian kuibing ngai dora bila borai nei na thona keng na ni u.

⁵Hatuka Pathian ruiril anzikna ei andangna anthiang vang, Pathian rama leng rua atia anti un na ti, hava rang ngala antak um nei tiar u.

⁶Ataktaka Pathian kom chu hiva hi adik, antakna ana pek ngai ha aman hangai ha, antak amara la pe inti.

⁷Hanuk antak nei tong u ha koini na bila pong na mansa unti. Puma Isua vanram ata ei anlianna le vanpalai ngai le moi a chuang ankula, hatik han hong anlang inti.

⁸Hanuk Pathian re lui ngai ha hanuk koini na Puma Isua thangahui tel lui ngai ha, adik pika man choi inti.

⁹Amani ha Puma kom ata ama ratna lian ata anthoka taituan tenpei anpeia siatna choina tong inti.

¹⁰Hava nikhua chu ami anthiang ngai ansang ranga, hanuk aiam ngai amani alom u na tichangbui ei ni u na ranga hong inti. Koinin na kom u na nei ril ha, hava ha iama anpom keng ani zei.

¹¹Hasik han koinin na rang u na hintin um anzom chiana bor nei zong. Koini na Pathianin nangni ha apai ruana ei na tel u na ranga hanuk asadima nei mandon u na le iamna sin atho thei taka nei makhip u na rang.

¹²Koini na Pathian le Puma Isua Krista a lungkhamna anga, koini na Puma Isua raming ei anpakna ranga, hanuk hava han nangnim anpaka om u ro.