Read Ranglong 2 THESALONIKA 3 Bible Online

2 THESALONIKA 3 - Ranglong bible

2 THESALONIKA 3

¹Chong heknana chu, hiva hi unai ngai, koini rang borzong u ro, nangni bila ei ni anga, hantin han Puma chong anrapa ansona ei anpakna rang.

²Hatuka koinin lungdet le mi salui ngai ata nei anrungna ranga, asik chu iamna nei kiar u mak.

³Tenchu Puma hi iamrua aman koini hi na mandet inti hatuka asiat ata na rung inti.

⁴Hatuka nangni ruia Pumana hin iamna det na don u, nei ril tak pei ha hava dora ha lei tel u ro.

⁵Hatuka Puman nangni ngai na malung u ha Pathianin ei aditna lama le Krista ei doroina lampuia mathok u ro.

⁶Hatuka, unai ngai, koini na Puma Isua Krista raminga nangni hi hiva chong hi keina pek u na, unai khat pei han omdan noka aleng ten hanuk nangnin koini kom ata anchuna nei man u ha, hava anga aleng nokten ama ha mathan u ro.

⁷Asik chu hontinmo nei zi rang, hava ha nangnin na riat u asik chu nangni bila koinin dan zi lui mi ni mak me.

⁸Hatuka aman abuia tute kom bu ne making. Hanekten nangni ranga tute puak anrik nokna rang hava ranga, apong asol chunga sun zan sin kei tho.

⁹Koinin ningneina nei bui nimak, tenchu na kom u na om tak anmu rang nei zot, hanke nei na zi u rang.

¹⁰Asik chu koinin na kom u na na om lai han hia chong hi nei na pek ha, “Mi sin tho zot lui tak chu, nek um nek no rase.”

¹¹Adika koinin nei lei riat; nangni bila senkhatin chu dan dik luia aleng, sin ngal tho luia dan noka ei anzonga ei om.

¹²Hava ang miring ngai ha koinin Puma Isua Krista raminga chongpek le nei manchu. Amani ha adai riama sin a thona abu ne u rase.

¹³Hatuka, unai ngai, nangnin sin asa atho ranga na chithai mandok u no ro.

¹⁴Hatuka hiva lekhana anril koini chong a zot nok tak chu mandangrap u ro, anloppui u no ro.

¹⁵Hanke ei anzak rang tenchu mumak u no ro unai ti u tan chunngo tho u ro.

¹⁶Hatuka anngoi Puma han alompeia na manngoi ba banga phukdaina na pe u rase. Puma ha nangni ngai dora nan loppui tit u rase.

¹⁷Hiva phamna chong koi Paulin ka kut nget le kei maziak lekha kipa han hiva hi ei andangna, hintin hin kei maziak chachak.

¹⁸Koini na Puma Isua Krista a lungkham nangni na lom u bila om rase.