Read Ranglong 1 TIMOTHI 1 Bible Online

1 TIMOTHI 1 - Ranglong bible

1 TIMOTHI 1

¹Paul, koini anan zokpu Pathian le koini nei sabei munkhata Krista Isua chongpek anga Krista Isua a kuitir.

²Iamna ruia ka nai madit tatak Timothi rang. Pa Pathian le koini na Puma Isua Krista ata lungkham lunglak le phukdai om rase.

³Makedoniana ka se laia keina mathem ha, Ephesina mi senkhat ha hiva chong pe ro, amani han anchuna tei pe u no rase.

⁴Hanuk sim le rikung abui rachina malung pe u ni, asik chu hava ngai han ankhalna ke asuak, iamna Pathian tianga mason na masuak mak.

⁵Tenchu ha chongpek amara chu malung anthiang, mandon asa le iamna tak ata asuak.

⁶Mi senkhat hiva ngai lampuia asiala akoronga chiara lampui noka ase zei.

⁷Amani han Dan anchupu ani rang ei zot u, tenchu ei ril tak le hava ruia adeta andanga chong ei ril hava ha tuak mak.

⁸Tenchu koinin nei riat Dan hi asa adan taka amang rang chu, hava ha ariata Dan hi adik ngai ranga ni mak.

⁹Tenchu dik lui ngai le dan poisak lui ngai le dan ansial ngai, Pathian tel lui ngai le mi annim ngai le asia tho ngai le Pathian anzakna lui ngai pa that ngai, nu that ngai le mi that ngai ranga.

¹⁰Uiare, rual anei ngai, a hur ngai, min ruk ngai, milak atho ngai, mi laka khomak ansam ngai ranga keng. Hanuk Pathian rui anthiang anchuna aleta a om ngai hava ranga Dan ansin keng.

¹¹Hava ha Pathian alian ei anpaka athangahui ang taka ha thangahui ka kom ansiak ang ni lui hava ranga keng.

¹²Ranak ana pekpu ha koini na Puma Krista Isua chunga ka raisanna ka ril. Asik chu aman ahian aiam ruana dorbondom ranga ei na phun.

¹³Mana adik antir, min ei rahok le maimok asak kei ni. Tenchu dualna kei man, asik chu re lui tana aiam nok anga hava sin ngai kei tho.

¹⁴Hatuka koini na Puma a lungkhama Krista Isua ruia iama le andit chunga achalaka atama anphula ei chul ani zei.

¹⁵Hiva chong hi iamrua le a pomrua sabak keng. Krista Isua ha asia ngai anzok ranga ramuala ei hong hava ngai bila koi him ankhit.

¹⁶Tenchu hava sika han andualna kei man asik chu Isua Kristan mansana koi mi salui khit ka chunga aduk diar theina ei hong manlang theina rang le, atun ata taituan damna aman ranga ama ala iam rang ngai rang en rua ni theina ranga.

¹⁷Ha Rengkhit taituan oma, siat thei lui, mu salui, Pathian atak rong ha taituana anlala le anliana om rase! Amen.

¹⁸Ka naipasal Timothi, aphamana na ruia deari chong ril theina ang han, ha anchuna chongbe ngai ha na koma keina manlon ani zei. Hava lehan anduina sa chu duipuina ro.

¹⁹Iamna le sia le sa riatna rung tit ro. Senkhatin sia le sa ei pei sika iamna rakuang ei kui pe.

²⁰Hava ngai bila Humenai le Aleksandar anchel u amani ha Soitan kuta kei thak, suisakna ei mana dikna antir amak ei anchu u na rang.