Read Ranglong 1 TIMOTHI 2 Bible Online

1 TIMOTHI 2 - Ranglong bible

1 TIMOTHI 2

¹Ka na mathem mansa u na hiva hi, mi dora ranga, anthem, azong, alop, phamna chong aril.

²Akhita reng ngai le sutmun ansang ansut ngai ranga, anboka annu zama adai riama anngoia phukdaia nei leng theina ranga.

³Hava ha koini anan Zokpu Pathian makunga asa le pomrua.

⁴Ama ei zot chu hiva hi mi dora ei zok rang hanuk atak ei riatna tenpei ei va suak rang.

⁵Asik chu Pathian khat dak a om Pathian le miring kong kara angkhat dak palai a om.

⁶Ama ha miring Krista Isua aman mi dora ranga zokna rang man anga aninga ei anpek hiva riatna hi a hun taka mang rua.

⁷Hava rang koi hi kuitira antir ranga anphun, ataka kei ril milaka ril makung, iama le ataka Jentail minchupu kei ni.

⁸Hasik han kei zot chu hiva ngai muna pasal ngaiin taksit luia le ankhal luia kut anthiang andoma borzong rase.

⁹Hantin den nupang ngai um anzak ariata ahian vanga ei anhui zotora anliang rase, a sam aphana le rangkachak rupa le ni mak, raliang le ni mak.

¹⁰Tenchu Pathian andon ansin rapa sin asa le anliang rase.

¹¹Nupang hetel, chong atom anchu rase.

¹²Minchu rang le pasal chunga ning anei rang ha nupang pe making, tenchu adai riama om rang ke kei pek.

¹³Asik chu mana Adam, nuka Evi ei sin.

¹⁴Hatuka Adam anhuang mak, tenchu nupang anhuanga masialna na achul.

¹⁵Hanum aninga diara, aloma andita le anthianga angira a om u ten nupang ha nai a mazira zokna manthei.