Read Ranglong 1 TIMOTHI 4 Bible Online

1 TIMOTHI 4 - Ranglong bible

1 TIMOTHI 4

¹Tenchu Rathan anthiang vanga ei ril nangkan chu mi senkhat ruai dik luina ratha ngai ata ratha sia ngai anchuna ngai amalung peka iamna ata ankhai inti.

²Hava ha milak athei ngai, phuazekam ngai, asia le sa riatna athi ngai, thir maling alumin ei nuk anga anuka om zei.

³Amanin in anei a khar u hanuk hongzazat mo sak amang akhar u, Pathianin ei zota ei sin ngai ha aiam ngai le atak omzia ariat ngaiin raisan aril chunga ei sak.

⁴Adika chu Pathian ei sin neinun dora asa, raisan aril chunga na sak ten ite antel lui om mak.

⁵Asik chu Pathian chong le hanuk borzong lehan hava ha ei anthiang.

⁶Hiva chong ngai dora unai ngai ha amalung na masui pe ten Krista Isua hasondom asa ni na ti, aiama le anchuna sa nei hong zi ani zei ama chonga mara om na ti.

⁷Tenchu adik rathol hanuk nupang atar sim papei ngai dora tel no ro.

⁸Hatuka Pathian poisaka athothei anzong ro. Asik chu taksa ansep hi itukmo chu ei nemna a om, tenchu Pathian andonna chu atuna a omsa le nangkana a om rang um damna apek ranga chongtin ei don sika hin alompeia ei nemna om.

⁹Hiva chong hi iamrua hanuk apomrua.

¹⁰Asik chu hava ranga han nei pong le tak nei sat nei anphal asik chu ha mi dora aliliaka aiam ngai Anzokpu ha hava Pathian aring ha nei hong sabei.

¹¹Nangin hiva ngai ruia chong pe ro, hanuk manchu ro.

¹²Na vanglai nikhua tute mandem no ro, tenchu chonga nei leng, nei anmanga, andita, iama le anthianga aiam ngai anchuna ni ro.

¹³Ka hong nok maseng anpore hanuk anthei le anchuna om chian ro.

¹⁴Na koma om, ha lungkham pek ha poisak luia om no ro. Deari chong ril lehan atar ngai kut dapa nei anpeka nei man ha.

¹⁵Ha ngai rui ha mandon ro hava dora han rat ro nei ansonpuina ngai ei anlangna rang.

¹⁶Na ruia le nei manchu ruia anreng ro, hava ngai a han ngir tit ro asik chu hava na tho ten nang naninga le na chong anngai ngai ha amani ham mazok inti.