Read Ranglong 1 TIMOTHI 5 Bible Online

1 TIMOTHI 5 - Ranglong bible

1 TIMOTHI 5

¹Nangin atar ango ta ni, tenchu ama ha pa anga. Ruathar ngai ha parual anga,

²nupang atar ngai ha nu anga. Nungak ngai ha aloma anthiang vanga sarnu anga re ro.

³Arong tatak ngai ha hava arong ngai ha lalchi tho u ro.

⁴Tenchu arong a naipasal mo atusa ngai a om tenchu, amani ha mansana a in u na mi ngai ranga Pathian andon anlang ranga le apa anu san ranga anchu rase. Asik chu hava ha Pathian makunga ei pom.

⁵Nupang arong tatak asang daka aom Pathian chunga sabeia sun zan bor azonga anthema om rase.

⁶Tenchu khoral athei ha chu adam chunga athi ke.

⁷Hiva dora hi chongpe ro amani ha, dem kai lui ni rase.

⁸Tenchu na unai mi ngai khita na in komi ngai ranga mandon lui aniten, ama ha iamna poisak lui ani zei hanuk aiam nok neka anbok keng.

⁹Ruathar khat alak akum somaruk thuai ni lui ngai ha aronga belbo ro.

¹⁰Hanuk asintho tina asa anlang. Hiva ngai hi ama han anai ngai a manliang ten, khual amal ten, mi anthiang ngai ke a rasuk ten, antak atong ngai asan ten sin asa tin a nuk azi.

¹¹Tenchu nungaka arong chu tel no ro asik chu Krista ei zot nok ahuiathei le in anei zot u.

¹²Amanin iamna mansa ha ei pom u lai nok sika choina aman u.

¹³Hava baka amani ha in tina anhila achei u na, andok anchu u. Andok rong ni mak achiar le atho nok rua atho ranga le aril nok rua aril anchu.

¹⁴Hasik han kei zot chu hiva hi nungaka arong ngai chu innei u rase, nai nei u rase; insungkua man ding u rase, anmumakin ei demna rang lampui pe no rase.

¹⁵Asik chu hiva man um senkhatin chu Soitan anuka lampui dik luia ei pan u.

¹⁶Arong ngai ha aiam nupang khat ina a om u ten aman hangai ha san rase. Kuibing puak rik no rase, arong tatak ngai ei san thei u na ranga.

¹⁷Kuibing upa ruiril asa chu chong rila le anchuna na apong ngai chu aliaka lalchi man rua keng.

¹⁸Asik chu Pathian lekha chonga ei ti, “Sang anchil serat tang amur mahip no ro hatuka sin athopu chu ei lo aman rua ani.”

¹⁹Kuibing upa ei siatna ariat anni anthum ani nok ten pom u no ro.

²⁰Asia tho ngai ha amani ha loko makunga chunngo tho u ro atei ngaiin um ei achi u na ranga.

²¹Koiin Pathiana Krista Isua le vanpalai anphun ngai makunga hiva hi adet mata chong keina pek ani zei, nangin mana nei riat sua baka hiva ngai zi ro, atebuhuaia ite tho no ro.

²²Tute chunga kut dap rak len no ro, hanuk mi ei sia ansempui no ro, anthiang tan anrung ro.

²³Atun ata ti rong ne no tan la, tenchu na von ranga, nei na reret sika alakte te gerep zu ti mang ro.

²⁴Mi senkhat chu asia ei tho u na anlang pum len sika han aphaman ata alei tiar len zet u.Tenchu mi senkhat asia tho chu nuka anlang pe na.

²⁵Sin asam hantin den andangphat hanuk atatei ha chu athupa asiak samak.