Read Ranglong 1 TIMOTHI 6 Bible Online

1 TIMOTHI 6 - Ranglong bible

1 TIMOTHI 6

¹Suakamin ngai chu apuma u ngai ha lalchi tho rua keng ti u rase, Pathian raming le anchuna ha ei andem nokna rang.

²Hatuka aiam mi apumana anei ngai ha amanin hangai ha parual ei ni u sika elsel mu u no rase, hanekten haneka taksa ata suak sin tho u rase, asik chu ha asana anmang mara man ngai ha amani ha aiam le andit rua.

³Hiva ngai hi manchu ro, lop ro, tulekin mo iamna atei a manchuna hanuk chong ha koini na Puma Isua Krista achong azi anga anchuna atel nok chu.

⁴Hava chu aom alian, ite relui. Tenchu makhal antak ruia rikhua tong ke ani zei hava ngai mara chu ansual, matirna tin, iam nokna siat.

⁵Hanuk mandon asia le atak abui mi ngai hiva anga mi ngaiin Pathian andon hi manna ranga a mandon.

⁶Chong takam, Pathian andon hi ei don tuka a malung atai ten, achan manna keng.

⁷Asik chu hi ramuala hin ite na bila hong koi mak me! Ite na bila choi um thei no ma ni.

⁸Amang rang thang nei ila hava han zot inti.

⁹Tenchu anei rang aval ngai ha ansinna le changtea hanuk amona tin le hekna ningola achul, hava mi ngai dora ha siatna le akangna na anning.

¹⁰Asik chu nei hi siatna bul ang khat keng, hava han ei anoka mi senkhat lam dik lui ei pan, hanuk lunghangna raling le ei anvit.

¹¹Tenchu, nang o Pathian mi, hava ngai ata rot ro. Hanuk dikna le Pathian andonna, Iamna, dikna, diarna, annuai dapa hiva ngai hi zi ro.

¹²Iamna na, anengna sana taksat ro; ringanlonna surtit ro hava ranga ankui ke na ni, hanuk ariat atampa makunga ha anpuangna asa ha nei pom ani zei.

¹³Aloma damna pekpu Pathian makunga hanuk ha Pontia Pilat akom anpuangna asa nei ril, hava Krista Isua makunga chong ka na pek.

¹⁴Nang hin dikna riti ha anthiang demna buia siak ro, Puma Isua Krista ei anlangna rang tenpei.

¹⁵Ha hava chanasapu le Reng lian khat dak reng achang ngai Reng le Puma chang ngai Puma, a hun taka Pathianin hong manlang inti.

¹⁶Angkhat dak thi ngai lui; aluapu riat phasam ra-anga leng min ei mu pial thei nok ha, mum ngai mak ama anlalna le a sinthotheina anlon chian rase! Amen.

¹⁷Atun taka anei ngai, amani ha hiva chong hi pe ro; amani ha borai athei malung ni no rase, hanuk a neia anngam no rase. Tenchu ha anai ngai anga aloma koini nei mang ranga anazon ha Pathian ama chunga sabeina don rase.

¹⁸Mi tei ei sanna ranga, om asa tho anei ni rase. Apekpu ni rase ansempui ranga tak asat ni rase.

¹⁹Hantin han amani ha amani rang amaton u na ranga chopui asa anga manding rase, damna tatak ei sur theina rang.

²⁰O Timothi, na koma anpek ha asadima siak ro. Pathian lalchi tho nokna lama chong korong le omzia bui chong papei min “Hianna” ei ti u akorong ankhalna ngai ata ankhai ro.

²¹Ha theina atina mi senkhatin chu iamna ruia apial u zei. Pathian lungkhamna na kom u na om rase.