Read Ranglong 2 TIMOTHI 3 Bible Online

2 TIMOTHI 3 - Ranglong bible

2 TIMOTHI 3

¹Tenchu hiva hi re ro hun heka hun antak sabak la hong suak inti.

²Asik chu miring ngai atheia andit, sum andit, aninga borai, dikna antir, maimok asak, nupa hetel lui.

³Phamna don lui, lungpong abui, amitel abui, dualna bui, bado thei, anchu salui ankhir.

⁴Arang ngur, asa dui, iamrua ni lui, asanok atho ranga angam, borai athei, Pathian andit lui.

⁵Pathian abiak aphua anga om unti, tenchu asinthotheina iam u no ni. Hava ang mi ngai ata ankhai ro.

⁶Hava ngai kara han mi senkhat a om, amani han in tina ase u na asia puak arik ngai le ningolna na ei val nupang amo ngai a huang arat riaia ei va manchu u chachak.

⁷Ni ngal sela atak rui hianna ava suak thei ni u maka, hangai ha ei va manok u.

⁸Janni le Jambri Mosi ei dui u anga, amani ha atak ei dui u. Hava mi ngai ha chu mandon asa don lai lui iamna ruia anhip.

⁹Tenchu maton lam apan thei ni ulai maka, asik chu hava ngai anga ei mo u na mi doran la mu unti.

¹⁰Tenchu nangin keina manchuna nei pom, kei anmang ngai, kei mandon ngai, iamna ngai, phukseina ngai, ditna ngai, diarna ngai, rahokna ngai tin antaka tonga nei hong zi.

¹¹Antiokeia, Ikoniana Lustrana ka chunga hongmo kei tong ngai, anrahokna kei diar hatuka hava ngai ata Puman ei na mazok.

¹²Hatuka Pathian andona Krista Isuana adam rang azot dora chu amani ngai tak chunga ansinsakna ei ni rang keng.

¹³Tenchu mi salui ngai le milaka thei ngai mi sialna ena aninga asiala anson riama lampui asiata pan unti.

¹⁴Ten nang chu nei anchu ngai ha adik phita nei riat ngai ha, hava han ngir tit ro, na riat hale tutu kom mo nei anchu.

¹⁵Hanuk na riat naipang te ata Pathian lekha chong anthiang nei riat hava ngai ha Krista Isua ruia iamna lehan nang ha zokna ranga ana manhian thei.

¹⁶Pathian phuksan ata lekhabuna anziak tin, anchuna lampuia, andikna lampuia, chunngona lampuia dikna lama anchuna lampuia anang ani na.

¹⁷Pathian mi amin, sin asa dora ranga anliangna ranga ni rase.