Read Ranglong TITA 2 Bible Online

TITA 2 - Ranglong bible

TITA 2

¹Tenchu chongiam adikin ei pom ke nei manchu rang.

²Patar ngai chu om adaia lalchi tho ruana, anrung theia, iamna dika lungkhamna duk adoroi ranga manchu ro.

³Havantin ang han nutar ngai ha a omdan u na Pathian lalchi dona ei om thei u na ranga, mi siat aril mo ole achalaka zun du ni no rase, om asa anchu thei mi ei ni thei u na ranga manchu ro.

⁴Nupang alan nui ngai anchuna ranga a ruathar le anai ngai andit ranga,

⁵atheia anrung thei, anthiang insunga nu sa a ruathar koma anpek thei tuten Pathian koma chong ahong asiata ei ril u nokna rang.

⁶Hantitin han pasal ngai um anrung thei ranga ril ro.

⁷Lampui tina min ei na en rua ranga na om mansa ro. Nei manchu ruia na malung pe ro, anreng ro.

⁸Chong asa mang ro siata ei anril nokna rang, asiat aril rua ei man u noka, na raldui u ngai ei anzak u na rang.

⁹Suak ngai apuma he ei tel rang ei annuai zot rang. Ei masang ret nok rang,

¹⁰ei maruk nok rang. Aiam rua ei ni le asa ei ni babang rang, Pathian koini sandampu rui anchuna anpaka ei om theina rang.

¹¹Asik chu Pathianin alungkhamna ei manlang mi dora ranga sandamna.

¹²Ha lungkhamna han ei na manchu chu Pathian poisak luia om, ramual tho dan apeia anrung theina, asa andit, ramual anthana leng,

¹³borsang nikhua nei asa nei maruang hin koini na Pathian lianna le sandampu Isua Krista ei anlang rang.

¹⁴Koini na rang anpek, asiat tin ata ei na mazoka mi anthianga ei na sina ama rang rong le asa tho zot ngai.

¹⁵Hiva ngai hi manchu tan la na racham tak mang ro na hen ngai ngai kom na mathora na ngo le, annuaia na mu u no rase.