Read Ranglong HEBRAI 11 Bible Online

HEBRAI 11 - Ranglong bible

HEBRAI 11

¹Iamna adon ti hi nei sabei ha ani nget, nei muthei nok ha ariat nget.

²Iamna le tian laia mi ngai han Pathianin ei pomna ei mator u.

³Iamna le nei riat thei ramual dora hi Pathianin ei sin achong le, amu sa hi amu sanok le ansin.

⁴Iamna le hanke Abelin dali Kaina neka asa ei va dar. Iamna leke mi dik atia Pathian pompuina ei man asik chu Pathian len han ei dar ngai apom pe. Ei iamna le Abel ala chong tit athi aninam.

⁵Iamna hake Enok thina ata akhai. Hatuka Pathianin a ruai tuten mu lai mak asik chu Pathianin ei ruai. Pathian chongin ei ti chu Enok ha anruai man Pathian rai aman san.

⁶Iamna nok ten tuten Pathian rai mansan thei mak, Pathian koma hong tak chu Iamna adon anang, Pathian ei om hi hatuka ama anrok ngai chu raisan man apek.

⁷Iamna hake Nova Pathian chong anriata matona atung rang ngai aman ei muthei nok anriat. Pathian he atela rakuang asin hava han ama le a inko mi ngai azok u. Ramual ha Pathianin adema Nova ha chu Pathian kom ata dikna amana hava ha iamna ata ke.

⁸Iamna hake Abraham Pathianin a paia ram khata se ro ati na, ha ram ha Pathianin apek ranga chong ei tin. A ram amaka honmo ei se rang ite re luia.

⁹Iamna han ram atei mi anga ei om ha rama Pathian pek ram han. Puanina a oma Isak um Jakob um ha chongtin munkhat aman Pathian koma.

¹⁰Abraham han Pathianin ei sin khopui alungphum adet le ei mansuk a maruang.

¹¹Iamna hake Abraham atar sabak suanam hatuka Sari nai anei thei lai nokam, Pathian a chongtin arung ranga aiam.

¹²Abraham hi ataka athi aninam, hiva mi angkhat ata khuk atampa asuaka anvana arasi anga, tipui balin song ramal atel sua sa lui anga.

¹³Iamna le ha mi ngai athi u. Pathianin achongtin aman u nokam alapa ata amu u na apham u, ram atei mi ke na ni cheianvai ke na ni hi phila atia apom u.

¹⁴Hantina chong aril ngai chu aram u rang arok u ti a manlang u.

¹⁵Aram mak u ngai mandon chian u mak, ei mandon ani uten akir retna her man unti.

¹⁶Hanekten ram ahui ual hake ei rangai u, ha chungvan ramual. Hasik han a Pathian u atia Pathian ei anpai ha anzak pui mak asik chu aman amani rang khopui alei sin zei.

¹⁷Iamna hake Abraham anai Isak adar ngam dali anga, Pathianin a mansin lai han. Abraham akom hanke Pathianin chong ei tin hanum ni rase anai dali anga adar ranga ansin.

¹⁸Pathianin Isak ke na khuk ei om rang atia chong ka tin ei ti.

¹⁹Abrahamin ariat Pathianin Isak athi ata a mathui thei hasik han na ti aniten Abrahamin Isak athi ata aman ret.

²⁰Iamna hake Isak, chongtin borsang ei ni nangkana Jakob le Esau arang.

²¹Iamna hake Jakobin Joseph anai ngai bor ei pek athi rang tiang, a raimola anboia Pathian amok.

²²Iamna na Josephin athi rang tiang Israel ngai Aigupta ata ei suak u rang rui aril, hatuka atho rua aril aruak ruia.

²³Iamna hake Mosi a nu le a pan athup anzir suale than thum. Naite sa sabaka amu u na reng he akhel rang achi u mak.

²⁴Iamna hake Mosi alian suale reng nainupang naipasal tia anpai ei zot nokna.

²⁵Pathian mi ngai le duk atiar azot chomokhat ranga pap athona ahui nek ten.

²⁶A riat thei Messia ranga ero sak alu sabak Aiguptana neinung nek ten nangkana raisan man ei man rang tiang amit asiak.

²⁷Iamna hake Mosi anngam Aigupta amak rang le reng takasi anchiluina. Amu salui Pathian ei mu sika akir ret rang zot mak.

²⁸Iamna hake Sekan anthona suakkhar matona thisen ankhua hatuka Thina Vanpalaiin naipasal anzir mansa Israel nai ei that nokna rang.

²⁹Iamna hake Israel ngai tipui sen ankan phil ahul anga; Aigupta ngaiin atho rang ati u na, tin avol u.

³⁰Iamna hake Jeriko bang ansiam Israel ngaiin ni sari ahil sua u na.

³¹Iamna hake notinu Rahabi athi rang ata akhai ha Pathian iam lui ngai bil ata, asik chu Israel misi ngai alei phama.

³²Kei la se tir rang mo? Ka rang hun om mak aril patna Gideon, Barak, Samson, Jeptha, David, Samuel, hatuka deari ngai.

³³Iamna le ram ngai le andui u na arat u. Hongmo adik ha, atho u na Pathian chongtin ha aman u, akoibaknei baikua amanchip u,

³⁴moisumpui ratna ngai athat u, khendaia ei thi u rang ata azok u. Ranak abui u nam arat u anduinana alian u na ram atei ngai a mandok u.

³⁵Iamna le nupang a unai athi anthuia aman ret, zokna pom ranga zot u mak, ansinsakna na athi u, anthuiretna tika damna sa ual aman ranga.

³⁶Senkhat ero saka, arazik u, atei zingzir le anthunga lung ina anruai.

³⁷Lung le andenga, korat le an ata bong anni chang u, khendai le athat u na. Bera vun le kel vun ansila ase u. anriang ansinsak le anpangsepa a om u.

³⁸Ramual hi amani rang omna rua ni mak! Cheianvai u na philchara, muala, khur sunga kua na ei om u.

³⁹Hiva rui ngai hi, iamna leke ei mator u! Hanum ni rase Pathianin imo ei tin ha man u mak.

⁴⁰Pathianin koini lampui ruia asa ual ei lei mansuk sika. Ei derdin chu koini le anlopa amani ei ansua u rang.