Read Ranglong HEBRAI 3 Bible Online

HEBRAI 3 - Ranglong bible

HEBRAI 3

¹Ka lom Kristian Pathianin ei pai ngai! Isua hi mandon u ta, nei iam nei ril havana Chaizung Ansang ani ranga Pathianin ei hong tir.

²Pathian ranga iamrua ei ni asin atho ranga athanga, Mosi Pathian ina iamrua ei ni anga.

³In nek ten in asinpu lalchi man ual. Havantin anga han Isua ha Mosi neka lalchi lian aman rua ani.

⁴In dora mi khatin ei sin chu aniten Pathian ke alompeia asin.

⁵Mosi ha Pathian ina a iamrua suak ei ni nangkana Pathianin ei ti rang ngai ei ril.

⁶Tenchu Isua ha iamrua Pathian in arung Pathian Naipasal anga. Koini hi ama in na ngama nei sabei ha na iam ten.

⁷Hasik han Ratha Anthiangin ei ti anga: “Avian Pathian he na riat u ten

⁸na malung mankhir u no ro na chipui u ngai anga Pathian aduia asel u na ha, philchara a om u lai han ama amansin u na.

⁹Hava han ana mansin u ana en u Pathianin ati, kum sommanli pei imo kei tho anamu u nam.

¹⁰Hatuka ka takasina hava mi ngai rang ka ti: ‘Iamrua noka a om u chachak ka chongpek atel ranga zot u mak.’

¹¹Ka takasina chong ka tin; ‘Ha ram pongansana ranga kei pek rang ha suak u no ni!’ ”

¹²Ka lom ngai, anreng u ro malung annim adon ving om u ta ni iam luia Pathian adam akom ata anhoi u ta ni.

¹³Hanek ten, tute papin ei na huang u nokna rang le malung ankhira nei om u nokna rang, nei ansan ansiat nget u rang anikhua, Pathian chongin koini rang “Anikhua” ati kar pei.

¹⁴Asik chu Krista le lom kiar ke na ni ahek tenpei aphuta nei iam na surtit ten.

¹⁵Hiva hike Pathian chongin ei ti: “Avian Pathian chong na riat u ten, na malung mansel u no ro, na chipui ngai anga Pathian adui u lai han.”

¹⁶Tumo hava ngai ha Pathian he riata ama adui ngai? Mosin Aigupta ata ei masuak ngai ha ni mak mo.

¹⁷Tu tak chungamo Pathian kum sommanli atak ei si? Pap atho ngai, Philchar rama aruak anzam hale.

¹⁸Pathianin chong atin lai han, “Pongansana rang ram kei pek u lut uno ni ei ti ha tu rang mo?” Asel ngai rang.

¹⁹Hatuka nei mu ram ha lut thei u mak, asik chu iam u mak.