Read Ranglong HEBRAI 5 Bible Online

HEBRAI 5 - Ranglong bible

HEBRAI 5

¹Chaizung ulian dora chu a mi ngai kara ei athanga ei phun Pathian abiak ranga amani rathul asia dar rang le dali dar rang.

²Ama han ite re lui ngai le masial adon ngai chu a madual chachak.

³Hatuka amalen ha rat lui ei ni sika mi masial sika rong ni maka dali ei dar tenchu ama rang um adara.

⁴Tuten atheia anphun ngai mak chaizung ulian lalchi man ranga, Pathian kuina ronga ke miring hi chaizung ei chang, Aron anga han.

⁵Havantin anga han Krista aninga chaizung ulian lalchi ruaina ei lak ni mak. Tenchu Pathian keng ati: “Nang hi ka Naipasal na ni; avian na Pa kei hong ni.”

⁶Aman, mun ateiam ati, “Umora rang chaizung ni na ti, Chaizung tho dan Melkizedek anga.”

⁷Ramuala a om lai Isua anringa borazong mit rathi le Pathian kom achap. Athi ata anzok thei, ei annuaia ei anphal sika Pathianin a rangai.

⁸Pathian Sapa aninam aduk tiar ata hetel anchu.

⁹A hong ansua vang tik chu, hetel ngai ranga umor damna nar ahong ani,

¹⁰hatuka Pathianin chaizung ulian atina apuang, Melkizedek a chaizung riti anga.

¹¹Hiva rui aril rua atampa na don tenchu nangni kom aril antak, asik chu relen thei u mak che.

¹²Minchu thei rang khop pei hun nei don u, hanum ni rase anchu nei nang tit u, Pathian chong mansana. Bu rum ne luia dut a buang na la nang u.

¹³Dut abuang ala nang bang chu naipang ke, asia mo asa mo ite riatna don lui.

¹⁴Bun rum chu ulian rang ke riatna ata asia asa azen thei.