Read Ranglong HEBRAI 9 Bible Online

HEBRAI 9 - Ranglong bible

HEBRAI 9

¹Chongtin mansa han anmokna riti le anmokna mun um a don.

²Puanin han tualpang munkhat anei hava ha Mun Anthiang anti. Hava han lem chuangna a om hatuka dokang achunga vaipol Pathian ranga andar a om.

³Hava Puan anrin anni suale hava ha Mun Anthiang sabak.

⁴Hava han Rangkachak maicham marim ahui ahalna hatuka ha Chongtin Kok aloma rangkachak le ansin rangkachak kheng manna ei om, hava han Aron a raimol ancher, hatuka ha lungpek anni chongpek anziak a om.

⁵Hava Kok achunga Cherub anni mantha nei Pathian a om ti ei manlang, amantha aphara ha pap andualna mun achunga. Tenchu atun hin arilna hun ni mak akip achanga.

⁶Hintin hin hava ngai ha ei manliang. Chaizung ngai ha tuala Puanina anikhua asin atho ranga ase u.

⁷Tenchu Chaizung Lian rong ha asunga aluta sin ava tho akuma voi khat. Thisen achoia ama rathul le mipui pap relui kara ei tho u sika adar ranga hava ha Pathian kom ava dar.

⁸Ratha Anthiangin anthiang vanga a manchu ha ei manliang u anga Mun Anthiang Sabak ha anlong la ni mak puan akong kara alan rin kar chu.

⁹Hiva ankhina hi atun taka hun hi akhin. A omzia chu dali andar le me avan that adar ranga Pathian kom hava ngaiin anmok ngai malung anzui mak.

¹⁰Asik chu nek sak le, abuang rua le anbolna atatei rong ei tho u rang ei ni sika. Hiva ngai hi pang tianga riti ani, hava ha Pathianin chong athar apek man ten bak ke.

¹¹Ten Isua Chaizung Lian ahong zeia asa dora hivan a om zei, puanina sinthona chu alian hanuk anzui; miringin ei sin puanin ni mak, hiva ramuala ansin bila ni mak.

¹²Krista puanina aluta ha Mun Anthiang Sabak han loko rang voikhat bera thi, serat thi, dali dar ranga kel thi choi maka, tenchu ama thi achoia umor damna koini rang ava man.

¹³Kel thisen, serat, sakuarpar, serat tuai ahal hava ngai ha mi chunga antheka hava anthiang nok ngai ha a manthiang.

¹⁴Hiva ngai hi adik aniten, Krista thisen le itukmo ei anthiang sa rang! Umor Ratha le ama Pathian ranga dalin sua ei andar. Ama thisenin na mandon; akorong ata amanthiang, Pathian adam asin nei tho theina rang.

¹⁵Hiva sika hin Krista hike chongtin athar ansuk, ankui ngai dora chu umor borsang aman ranga Pathian chongtin ha hiva hi ei ni thei. Asik chu athi ei om sika mi ngai ei zok thei masial ei don u ata chongtin mansa sin atho lai tak.

¹⁶Chongtin ruia chu atinpu ha athi ti anlang anang.

¹⁷Chongatin ha adam le ite omzia nei mak ei thi suana ke sin ei ro.

¹⁸Hasik hanke chongtin mansa ha thisen anmang le rong sin ei tho.

¹⁹Mansana Mosin chongpek ngai mipui kom arila Dana om anga. Hatuka serat thisen, kel thisen ha ti le a manpola Dan lekhana athe hatuka husop le samul asen le mipui athe.

²⁰Hintin ei ti, “Hiva thisen hi Pathian pek chongtin mor anzem nangnin nei tel u ranga.”

²¹Havantin anga han Mosin Puanin Anthiang le alompeia anmokna ranga anmang ngai chunga thisen athe.

²²Tenchu Dan anga chu alompeia thisen leke ei anthiang, pap ei andual thisen anlei rongin ke.

²³Hava ngai ha vanram ramil mai ke, hantin han ei anthiang rang. Tenchu vanram neinun ngai len han anbolna sa ual ei nang.

²⁴Krista ha Mun Anthiang Sabak miringin ei sina se mak hava ha atak ramil mai ke. Vanrama ke ei se, atun koini rathula Pathian matona avanlang.

²⁵Juda Chaizung Lian ngai Mun Anthiang Sabak akuma voikhat ase thisen achoia. Tenchu Krista chu ama len andar ranga se chian mak.

²⁶Hanoten hi ramual ansin len ata voi hozetmo duk tiar zei ni. Hava ni maka atun kum ahek rang tiang voikhat loko rang ahong anlang ama le anbola pap ei saina rang.

²⁷Mi dora voikhat nei thi rang hatuka Pathianin arui ei zek rang.

²⁸Havantin anga han Krista ha dali anga voikhat andar pap atampa ansai ranga. Voi anni changna hong anlang ret inti, pap sika ni lai mak tenchu alei anruang ngai anzok ranga.