Read Ranglong JAKOB 1 Bible Online

JAKOB 1 - Ranglong bible

JAKOB 1

¹Jakob Pathian le Puma Isua Krista asuak akoma. Pathian mi ramuala muntina anthek ngai dora ka na mok u.

²Ka lom ngai na lampui u na ansinna dora ahong le ravana be u ro.

³Asik chu nei iam nan hava ansinna ngai dora amator tik chu ei mazir rang chu adiar theina.

⁴An re sadim ro nei diarna han anbaluia na ruai rase. Nei anzuia nei ansua na rang ite nei bansam nok na rang.

⁵Hianna ansam na om uten Pathian kom zong u ro, Na pe inti, asik chu Pathianin mi dora lungkham le a lei pek.

⁶Tenchu bor na zong le iam luia borzong no ro. Iam lui tak chu tipui zuar ansok ang ke, thinthin ei sema ei ruai ang ke.

⁷Havantin ang naniten malung sinsak thei lui, ei tho tak masuk thei lui naniten Puma koma ite aman ranga an iam no ro.

⁹Kristian anriang ngai Pathianin adom le arai mansan rase.

¹⁰Kristian anei ngai Pathianin amasum le arai mansan u rase. Asik chu nei hi anpei rang keng rama chiak kung anga.

¹¹Ani honga suak ei lumna le ahong ra-ema akung achara; a par ngai achul ei sana asiat. Hantitin han neinung aval ngai chu asing ansana tina ei chuaia ei chul rang a ni na.

¹²A chanasa ngai chu ansin nanam iamrua ani tit ngai, asik chu hantina ansinna azui ule raisan pek Pathianin apek ranga ei tin ha man unti ama andit ngai chu.

¹³Ha anga ansinnan ana mathem le, “Hiva anthemna hi Pathian ata ke.” anthemna kei tong ti no rase. Asik chu asiatin Pathian mathem ngai mak, hatuka amalenin mi mathem ngai mak.

¹⁴Tenchu anthemnana nei chul hi na mandon han ana ruaia ei na ok chachak sika ei ni.

¹⁵Hatuka nei mandon asian pap amazir; hatuka puiating suale thina ei ni.

¹⁶Anhuanga om u no ro ka lom ngai!

¹⁷Manbui pek asa le pek dora hi anvan ata ahong ke; Pathian asinpu kom ata hong van ra-ang asinpu, anthul lui le aralim anthot ret ngai ang ngal anthot ngai lui ei ni.

¹⁸Ama ei zotna le dikna chongtiang ei na hong tuang, ei sin ngai lima mankhita mun aman ranga.

¹⁹Hiva hi mangil u no ro ka lom ngai! Mi dora hi anngai rang chu anrap rase! ten achong ranga chu annu rase atak silen no rase.

²⁰Miring taksitnan Pathian derdin adik manthei mak.

²¹Hasik han asiat atho anzong dora pei u ro hatuka salui nei tho chachak pei u ro. Pathian kom anbetok tan achong pom u ro ha na malunga ei ling ha, ha anan zok theina a don ha.

²²A chong anngai duai a anhuang no ro; hanek ten anchu ro.

²³Chong na rangaia na tho nok ten, dapona an ena ama anmu ngai ang ani.

²⁴Asana anmuna ase hatuka imo ei phua ha amangil.

²⁵Tenchu ritin sua asadima na enten ha mi anzok ha hatuka na malung na peka rangai papei lui naniten hanuk na mang ten nei tho dora Pathianin borsang na pe inti.

²⁶Pathian andon ka ni anti na om u mo? Na malei na rung nok ten Pathian andon nei anti ha akorong na theia anhuang na ni.

²⁷Pa Pathianin Pathian andon ei ti chu hiva hi; nupa bui sakangcha, arong a en azon ngai, ramual siatna ata ankhai thei ngai hi ani.