Read Ranglong JAKOB 2 Bible Online

JAKOB 2 - Ranglong bible

JAKOB 2

¹Ka lom ngai Puma Isua Krista na a iam ngai ha Puma lianna na mi nei en u mantei u no ro, a pang tianga ei anlang anga.

²Anei khat rangkachak alina puan asa a rasila ahonga hanuk anriang khat puan akhel le ahonga,

³ha anei ha lalchi na tho uala, “Horo hia ansutna hui khita ansut ro,” na ti. Tenchu ha anriang chu, “Hin anding ro hano ka ke kola ansut ro na tina,”

⁴nei mandang ei om sika masial a don ke na ni zei mandon asiat aneia azek ke na ni zei.

⁵Rangai u ro ka lom ngai! Pathianin anriang ngai ke hi ramuala iamna na anei ranga ei athang hatuka rengram, chong ei tin alua rang.

⁶Ten anriang chu lalchi tho mak che! Tumo pengsom ana tho u rui azek matona ana kei u? Anei ngai ke.

⁷Raming asa nei man ha amani ke asiat aril.

⁸Rengram riti nei zi aniten adik tho zei na ti ha Pathian chongin ei ti ha. “Na in kol mi nang na anga lungkham mu ro.”

⁹Tenchu mi apanga ei anlang anga na tho ten pap atho na ni hatuka ha ritin ana dem ritin chai anga.

¹⁰Chongpek angkhat na machai ten aloma nei machai.

¹¹“Uire no ro,” atipu den han, “Tual that no ro,” ati. Ui na re nokam ritin sial ke na ni zei tual na that ten.

¹²Na chong anga tho ro arui anrila a zok ngai rang anga.

¹³Lungkham abuia mi arui aril tik Pathianin lungkham mu no ni; tenchu lungkham hi ruiril chunga arat.

¹⁴Ka lom ngai, imo ei sana iamna ka don na tia tenchu na omin amanlang nok ten? Hava iamnan ana mazok thei mo?

¹⁵U le nai a oma puan abui anek rang abui.

¹⁶“Pathianin bor na pe rase! Lum u ro. Neksak asa tho u ro!” Na ti pena ite ei nang pe luia imo alam luana?

¹⁷Hasik han iam; han tho anchel nok ten athi keng.

¹⁸Ten angkhatin atina, “Angkhatin iam anei, angkhatin sintho anei.” Ten kei ti ni zei, “Asin anchel luia ei iam na manmu ro. Kei iam na manmu ka ti athona.”

¹⁹Pathian hi angkhat keng ti na iam mo? Asa! Raluai ngalin a iama achina annok.

²⁰O amo! iam hi sintho abui chu akorong keng ti anmu mo na nang?

²¹Hontinmo koini na chipui Abraham ha Pathianin adika ei pom? A sin tho le nimak mo ha, Isak maichama ei va dar han nimak mo.

²²Muthei mak che mo? Ei iam le asin munkhata ei ro; ei iam ha sina ei ansua.

²³Hatuka Pathian chong adika ahong tina, “Abraham Pathian a iama ei iam sika Pathianin adik atina apom.” Hasik han Abraham ha Pathian mal atia anpai.

²⁴Hasik han na sin leke Pathian le nei anngoi iam duai le nimak.

²⁵Notinu Rahabi le ham hantin den. A om le hanke Pathian le ei anngoi, ha Israel misi ngai ha alei phama alei san lampui ateia aman rot.

²⁶Hantin anga han taksa ratha bui chu athi ei ni anga iam a sin abui chu athi.