Read Ranglong JAKOB 4 Bible Online

JAKOB 4 - Ranglong bible

JAKOB 4

¹Ansual anzem na kar u na hovan ata hong mo? Hava ha na taksa u na a om ansualna ansuak chachak asia ningolna ata honga suak nimak mo?

²Nei man zot man mak che, hasik han athat rang nansin; alompeia aman rang achan na zot tenchu manthei mak che, nan sual u na nan zem u, Imo nei man zot ha man mak che asik chu Pathian zong mak che.

³Hasik han na zong le man mak che, asik chu na derdin samak, nei zong ngai nei huina ranga ke.

⁴A iam salui ngai ramual le lom chu Pathian adui ke remak che mo? Ramual le lom nan chang zot ten Pathian le andui ke na ni.

⁵Pathian chonga adik ei ti ei ril papei rang iam no ro. “Ha ratha koini koma Pathianin ei siak ha arang malung ke.”

⁶Ten Pathian lungkham chu hava neka arat. Pathian chongin ei ti anga, “Pathianin anlian ngai chu akhaia annuai ngai lungkham amu.”

⁷Hasik han Pathian kom anbetok ro. Diabol heng ro, na kom ata rot inti.

⁸Pathian hongdep ro, na hong dep inti; mi salui ngai na kut rasuk u ro; malung anni don ngai na malung manthiang u ro!

⁹Na malung manna u ro, chap u ro, anram u ro, na mani ha chapna le thul u ro na raisanna ha anngui le thul u ro!

¹⁰Puma matona annuai u ro, na dom inti.

¹¹Ka unai ngai siat an ril u no ro. Kristian siat na rila arui na ril ten riti siat aril le azek na ni, riti siat na ril ten azi nok na ni.

¹²Pathian rong ke riti apekpu le rui aril thei. Ama rong ke anzok thei ansiat thei. Hongamo nei anbe mi rui ril rong nei ti?

¹³Atun chu rangai u ro, nei ti ni zei, “Avian mo nangtuk mo khopui khata se inti, kum khat om intina sum suana tho inti na, sum atampa sua inti.”

¹⁴Nangtuk imo nei ni rang ite remak che! Moikhu mazup khop bak ke na ni chomokhat anlang anpei ret.

¹⁵Hiva hike nei ti rang, “Puma azot ten hia tho inti sova tho inti.”

¹⁶Ten atun chu nan liana, omalian na thona; anlian hi dik mak.

¹⁷Hasik han asa na tho ngai ti na riata na tho nok ten asia tho na ni.