Read Ranglong JAKOB 5 Bible Online

JAKOB 5 - Ranglong bible

JAKOB 5

¹Atun chu anei ngai ka he rangai u ro! Antak na chunga ahong ranga sika chapa anram u ro.

²Na nei u ngai athu zei, na puan u ngai leidan asak sua zei.

³Na rangkachak, sumru u thirek akop zei, ha thirek len ha ana mu ana dui ni inti, na taksa u ngai moi anga kanga na sa inti. Hiva nikhua hek tiang neinung nei man kam.

⁴A at anlo ngai ei lo ite pe u mak che, a lo nei pek u nok ngai ei ankhek u na le anhuang ngai ei chap u na Athothei Puma Pathian kuar ava suak.

⁵Hi phila nei dam ha ahui a hek sabak antan rang nikhuana ranga na mar sabak zei.

⁶Mi na masiata, ite relui ngai na thata, hatuka na heng thei u mak.

⁷Ka unai ngai, lei diar u ro, Puma hong tenpei. En u ta itukmo ei diar u a phai atho pun roti mansa le roti nukhon a man maseng chu antak diara amara alu chu a maruang chachak.

⁸Nangnim diar u ro, nei sabei mansang ro; Puma ei hongna nikhua anai zei.

⁹Siat anril u no ro ka unai ngai, Pathianin na zek uni. Ha rui azek rang anai zei ahong anlang rang ani zei.

¹⁰Ka unai ngai, deari ngai ha re u ro Pathian raminga chong aril ngai, antak kara adiara andoroi ngai ha ankhina anga mang u ro.

¹¹A chanasa ngai nei ti asik chu ei diar u sika. Job ei diar ha na riat zeia.Ahek tiang itukmo Puman ei zon, Asik chu Puma chu lungkhamna bit.

¹²Havaneka ka unai ngai chong na tin le khomak ansam u no ro anvan achina phil achina khomak ansam u no ro atei ite ril u no ro. “O” na ti ten o ti ro. “Mang” na ti ten mang ti ro, han keng Pathian ruirila nei om nok rang.

¹³Anpon mo na om u na kar u na? Borzong rase. Na kar u na a raiasan mo om? Anpakna la tho rase.

¹⁴Na kar u na ana mo om? Kuibing upa kui rase, arang borzong rase hatuka sariak khua rase Puma raminga.

¹⁵Hivantina iamnana bor anzongin ana mandam inti Puman adama makhir ret intia asia ei tho ngai andual inti.

¹⁶Hasik han bor anzong u ro nei siatna andar u ro, nei dam thei u na rang. Mi sa ngai borzongin sin alian atho thei.

¹⁷Eliza ha koini na anga miring ani a. Malung apeka rua ei hong nokna rang bor a zonga, phila rua chul mak kum anthum atan.

¹⁸Bor azong reta rua ahong philin anna amazir.

¹⁹Ka unai ngai adik ata ankhai na om u na mi angkhatin ei na hong makhir ret u aniten,

²⁰hiva hi re u ro: mi salui khat ei masial ata amakhir ten ha mi salui a ratha ei ma zok ke thina ata hatuka masial atampa andualna hong choi.