Read Ranglong 1 PITOR 4 Bible Online

1 PITOR 4 - Ranglong bible

1 PITOR 4

¹Kristan a taksa le atiar takanten, hava ngai lehan ansin u ro nangnim imo ei teng ha andon u ro; taksa le atiar ngai chu asiana anchel laimak.

²Atun ata na damsung ni hi phila Pathian maruaia ni rase miring zot dana ni no rase.

³Na hun mang u ahun zei iam lui ngaiin ei tho athona. Nei anmang u ngai ha asiata, ningola, anrinana, taksa zotna ramil abiak, zubual.

⁴Ten atun chu hantin han om u lai mak chena aboi adong u, hasik han na siat aril u.

⁵Tenchu Pathian matona la be unti azek ranga ansin athi ngai le adam ngai azek rang.

⁶Hasik hanke athi ngai kom ngal Pathian chong ei van ril, adam laia arui anril sua mi dora arui anzek anga; a ratha damna lua chu Pathian anga ei damna ranga amani kom anril.

⁷Alompeia ei hekna hun anai zei, anrung thei u ro, meng u ro, borzong thei u ro.

⁸Hava panga han lungkham anmu u ro, asik chu lungkhamin asiat atampa azui.

⁹Chiar luita na ina khual lei pham u ro.

¹⁰Asang chipa Pathianin ei pek atei chip amang thei anga mang u ro, mi tei rang amanga ha abinga pek Pathian koma ei man ha.

¹¹Chong aril ngaiin Pathian chong ril rase; ha ranak Pathianin ei pek ha hava le a dorbo adom rase, hankeng alompeia sika anpakna Pathian kom ei anpekna rang Isua Krista zara anlianna le thotheina ama ta umor umora Amen.

¹²Ka lom madit ngai, antak nei tiar u na anlai u no ro, atong nok rua atong anga.

¹³Hanek anten na rai mansan u ro asik chu Krista tiarna nei ansem pui ei lianna le ahong anlang tik na raisanna ei bit u narang.

¹⁴Chanasa na ni u, min na siat aril u ten asik chu Isua azi na ni u, hiva tina chu anlianna Ratha Pathian Ratha na kom u achum.

¹⁵Antak na tiar u ten, mi that sika ni no rase anru sika, masial sika, mi ruia akop sika ni no rase.

¹⁶Ten Kristian nei ni sika nei tiar aniten anzak no ro Pathian kom raisanna mantung ro Krista raming nei raput sika.

¹⁷Ruirilna hun ahong zei Pathian mi ngai ke mansana arui ei anril rang. Koini le anphut ten, hontinmo hek ni tak Pathian Thang Ahui, iam lui ngai rang.

¹⁸Pathian chongin ei ti anga, “Mi sa ngai ei zokna rang ngal antak Pathian abui miruanok ngai le imo ni u ni?”

¹⁹Hasik han Pathian ei zota atiar ngai chu, asa ei tho u sika Asinpu atheia iam u rase, umora a chongtin arung.