Read Ranglong 1 JOHON 4 Bible Online

1 JOHON 4 - Ranglong bible

1 JOHON 4

¹Ka lom ngai ratha dora iam u no ro, tenchu mansin u ro Pathian ata hongmo, asik chu deari atampa muntina asuak zei.

²Hintin hin ani Pathian Ratha nei riat theina rang; Isua Krista hi miring anga ahong ha Pathian koma hong Ratha ke.

³Tenchu Pathian koma hong Ratha he atina pom lui tak chu, a ratha don ha Krista raldui ata la hong inti atia nei riat ha, atun ramuala a om sua zei.

⁴Tenchu nangni chu Pathian ta na ni u, deari diklui ha na mandok u zei, asik chu na koma Ratha ha ramuala ratha nek ten ranak anei.

⁵Ha deari diklui han ramual rui arila a rangai u, asik chu ramual ta ei ni u sika.

⁶Tenchu Pathian ta na ni u na, Pathian ariat ngaiin chu a rangai, Pathian relui ngaiin chu rangai mak. Hintin hin ani Ratha adik le ratha diklui nei riat theina.

⁷Ka lom ngai andit anlom u rei asik chu anditna hi Pathian ata hong, andit chu Pathian nai ei ni Pathian um ei mu.

⁸Ditna mului chu Pathian relui asik chu, Pathian chu ditna ke.

⁹Pathianin anai don selep hi ramuala ahong tir a amana damna nei mantheina rang.

¹⁰Ditna ti hi hiva hi ani; koinin Pathian nei adit nimak, tenchu ei na dita anai ei hong tir koini rathul ranga nei siatna ei andualna rang.

¹¹Ka lom ngai hintin hin Pathianin ei na dit aniten, koinim nei andit rang anang.

¹²Tuten Pathian la mumak, tenchu andit na ni ten, Pathianin ana ompui, ei na maditna koini kom ansua.

¹³Nan iam Pathian le munkhata om na ni, hatuka koini kom ama a om, asik chu a Ratha ei na pek.

¹⁴Nei muna mi kom nei ril Pan Naipasal ahong tir ramual anzok ranga.

¹⁵Isua hi Pathian Naipasal atina na ril ten, Pathian le munruala leng na ni, Pathian ana leng pui ani.

¹⁶Na theia na riat hatuka na iam Pathianin ditna koini ranga ei don. Pathian chu anditna ani, anditna na aleng ngai chu Pathian le om hatuka Pathianin lokona ei ompui ngai.

¹⁷Anditna chu koini kom akipa ei om, ruiril nikhuana nei anngam theina rang hatuka la don inti asik chu ramuala nei dam hi Krista anga ei ni.

¹⁸Ditna hin anchina om mak, ditna dikin anchina pei zit, ala chi ten ditna la kip mak, asik chu anchi chu anpangsepna a om.

¹⁹Nei adit asik chu ei na dit mansa.

²⁰Pathian na ditna tina mi na mumak ten milak na ni. Asik chu Pathian adit thei makme, nei la mu ngal nok, mi nei mu ngal na dit thei nok ten.

²¹Kristan chong ei na pek chu hiva hi ani; Pathian anditin chu mim adit inti.